Śpiektakl-himn pra źbiralnika biełaruskich narodnych kaściumaŭ pakažuć 22 studzienia

Ramaniuk – adzin ź lehiendarnych ajčynnych mastactvaznaŭcaŭ. U hłuchija brežnieŭskija časy jon za svaje hrošy abyšoŭ u ekśpiedycyjach usiu Biełaruś, źbirajučy i šukajučy biełaruskija narodnyja kaściumy, a taksama zamaloŭvajučy ich źniešni vyhlad.

Ich vynikam stali bolš za 130 rekanstrukcyj tradycyjnych strojaŭ biełarusaŭ, jaki ŭvajšli ŭ albom «Biełaruskaje narodnaje adzieńnie» (vyjšaŭ u 1981-m).

Na padstavie strojaŭ Ramaniuk vyznačyŭ piać etnahrafičnych rehijonaŭ Biełarusi: Zachodniaje Paleśsie, Uschodniaje Paleśsie, Prydniaproŭje, Centralnuju Biełaruś, a taksama Paniamońnie i Naddźvińnie.

3 studzienia Ramaniuku spoŭniłasia b 70 hadoŭ, ale jubilej prajšoŭ amal niezaŭvažany.

Siarod tych, chto adhuknuŭsia — Łarysa Simakovič. Kampazitar, baletmajstar, mastacki kiraŭnik falkłornaha teatra «Hościca», udzielnica lehiendarnaj biełaruskaj «Majstroŭni».

Pieryjadyčna Simakovič ažyćciaŭlaje ŭ Fiłarmonii prajekty, pryśviečanyja znakavym postaciam ajčynnaj kultury.

Siarod ich sučasnaja misteryja «Dzień Maksima Bahdanoviča», rok-opiera Mulavina «Pieśnia pra dolu» i rondo-opiera «Lucyjan Tapola», pryśviečanaja 100-hodździu Maksima Tanka.

Da 70-hodździa Ramaniuka u Fiłarmonii projdzie śpiektakl-himn «Vandroŭnik», jaki pastavić Simakovič.

U prajekcie prymie ŭdzieł Dziaržaŭny kamierny arkiestr Respubliki Biełaruś (mastacki kiraŭnik i hałoŭny dyryžor Jaŭhien Buškoŭ), folkłor-teatr «Hościca», etnahurt «Horeń», etna-supołka BDU kultury i mastactva i studenty tvorčaj majsterni Uładzimira Miščančuka ź Biełaruskaj dziaržaŭnaj akademii mastactva.

Pakaz adbudziecca 22 studzienia (sierada) ŭ vialikaj zali Biełaruskaj dziaržaŭnaj fiłarmonii. Pačatak a 19-j.

***

Na svajoj staroncy ŭ Fejsbuku Łarysa Simakovič tłumačyć fienomien Michasia Ramaniuka i, adpaviedna, nastroj śpiektakla-himna praź vieršavanyja radki:

ČYRVONAJA JAHADA, ČORNY ŽBAN…

Jahony kaśmizm — raskidanyja pa suśvietu suzorji.
Zornyja žmieni zdabytaha charastva.
Pryharščy adkryćciaŭ, ździŭleńniaŭ i dzivosaŭ, kinutyja ščodra na rallu biełaruskaha Adradžeńnia.

Ziernie ŭzychodzić.
Čyścinia ranišniaj rasy i radaść biazvažkaha śniehu źbierahajuć zialonuju ruń.
Vandroŭnik pa krainie Biełaruś!
Źbiralnik duchoŭnych skarbaŭ i dyjamientaŭ nacyjanalnaj spadčyny.

Čyrvonaja jahada, čorny žban, kuželnaje pavucińnie — usio śpiavaje himn i zachłynajecca ŭ radaści.
Hałosić niečakanaj navalnicaj i patanaje ŭ ščaści być zachavanymi…

Kab doŭžyć,
doŭžyć,
doŭžyć,
doŭžyć
isnavańnie… hetaj zahadkavaj krainy… Biełaruś….

• 0
• 0
• 0
• 0
• 0
• 0
• 0
• 0