Novyja padrabiaznaści pra film «Aviel»: siońnia płanujucca «vybuchi» na praśpiekcie
Adzin z epizodaŭ filma «Aviel», vytvorčaściu jakoha zajmajecca biełaruskaja kinakampanija «Nonstop miedyja» ŭ supracoŭnictvie z Hiermanijaj, ZŠA i Rasijaj, budzie pryśviečany teraktu ŭ minskim mietro 11 krasavika 2011 hoda i «hieraičnym dziejańniam ratavalnikaŭ».
Pra heta paviedamiŭ pradziusar kampanii Siarhiej Ždanovič.
Pavodle jaho słoŭ, masavyja pratesty ŭ Minsku paśla prezidenckich vybaraŭ u 2010 hodzie, vybuch na Kastryčnickaj stancyi staličnaha mietrapalitena, jaki zabraŭ žyćci 15 čałaviek, — heta «balučyja temy dla biełarusaŭ».
«Ale my najpierš zdymajem mastackaje kino, — adznačyŭ pradziusar. — My pakazvajem nie peŭnuju prablemu ci padzieju, a pakazvajem trahiedyju čałaviectva. Z vybucham u mietro ja supastaŭlaju vybuch u Bostanie, Vałhahradzie. U Biełarusi heta sapraŭdy było, paciarpieli ludzi. A byli i tyja, chto hieraična ratavaŭ ludziej u hetaj situacyi, naprykład chłopcy z kamand MNS. Viadoma ž, chočacca heta pakazać. Ale znoŭ ža my nie budziem rabić rekanstrukcyju».
31 studzienia dla «Aviela» na praśpiekcie Niezaležnaści zdymajuć scenu z sutyknieńniem niekalkich mašyn, jakija, kali dazvolać umovy nadvorja, navat padarvucca.
Dla bolš efiektnaj karciny zdymačnaja bryhada płanuje vyprabavać nabyty ŭ ZŠA multykoptar, jon ža dron, — kiravany latalny aparat, da jakoha macujucca roznyja pryłady, u tym liku kinakamiera. U takim vyhladzie dron možna vykarystoŭvać dla zdymak scen ź vialikaj vyšyni.
Kinastužka «Aviel» stvarajecca pa zamovie Ministerstva kultury, na jaje było vydzielena bolš jak 20 młrd. rubloŭ (2,17 młn. dołaraŭ). Režysior-pastanoŭščyk karciny — amierykanski kaskadzior i pastanoŭščyk trukaŭ Uiljam de Vital, jaki źjaŭlajecca vychadcam z Ukrainy.
Praca nad epizodami, u jakich dziejańnie adbyvajecca padčas masavaj demanstracyi, viadziecca 30 studzienia — 2 lutaha na praśpiekcie Niezaležnaści ad Kastryčnickaj płoščy da płoščy Niezaležnaści, pieravažna viečaram i nočču.
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury5
Kamientary