Minski kłub Coyote užo ŭ treci raz pravodzić premiju Cover King. Heta sproba vyznačyć, chto ŭ mastactvie interpretacyi dasiahnuŭ najbolšych vyšyń. Uznaharoda taksama nie maleńkaja - $3000.
U kłubie daŭžeznaja čarha – kavier-hurty z usioj krainy rehistrujucca na konkurs.
Tut i nievialikija arkiestry ź dziesiaci čałaviek, i dziavočyja hurty, i navat Ihar Varaškievič z prajektam Los Bulbas: try tysiačy dalaraŭ — nie maleńkaja suma,
dyj najaŭnaść u sudziejskim składzie pradstaŭnikoŭ ivent-ahientstvaŭ (patencyjnych pracadaŭcaŭ) abaviazvaje.
Žury ŭ «Karala kavieraŭ» admietnaje – siarod inšych muzyčny krytyk Źmicier Padbiarezski i hitaryst Siarhiej Truchanovič, čyj hust pad sumnieŭ nie pastaviš. Da ich dałučajecca Jan Žančak, jaki pieramoh u konkursie letaś z hurtam Jankey.
U minułym hodzie ŭ konkursie ŭziali ŭdzieł sorak kamandaŭ, sioleta – dvaccać čatyry. Ciaham miesiaca pa aŭtorkach hurty buduć spaborničać pamiž saboj u kłubie Coyote (pr.Niezaležnaści, 117a).
«Ja b paraiŭ vam vyklučyć z repiertuara pieśni, jakija ŭsim nadakučyli, - raić Jan Žančak. – Naprykład, «Vidieli noċ» albo «Kosmodrom». I šou, treba pracavać z šou».
Kožnamu kalektyvu daduć 20 chvilin, u prahramie musić być adna abajazkovaja dla kožnaha hurtu pieśnia. Vybar pieśniaŭ taksama vyhladaje vidavočnym: Come Together, No Woman No Cry, Knockin' on Heaven's Door i You Never Can Tell.
Pa słovach arhanizataraŭ, takija konkursy dapamahajuć maładym vykanaŭcam: šmat chto, pieramahajučy, pačynaje stvarać i svoj aŭtarski materyjał.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ9
Kamientary