Aktyvistka ruchu Femen surjozna paškodziła vaskovuju fihuru rasijskaha prezidenta Uładzimira Pucina ŭ paryžskim muziei Grévin. Incydent adbyŭsia 5 červienia. Spačatku dziaŭčyna z nadpisam Kill Putin na aholenych hrudziach ubiła ŭ statuju «asinavy koł», a zatym pavaliła jaje, raskałoŭšy hałavu. Fotaspravazdaču ab hetaj akcyi «sekstremistki» vykłali na svaim sajcie.
Takim čynam «palaŭničaja za vampirami pakazała śviecie adzina mahčymy farmat dyjałohu z kramloŭskim Drakułam», heta była simvaličnaja akcyja «suprać lehitymizacyi rasijskaha dyktatara lidarami suśvietnaj demakratyi», tłumačać u Femen. «Ukraina pavinna być svabodnaj», — reziumujuć fieministki.
Paškodžanaja fihura Pucina apynułasia kala noh vaskovych vyjavaŭ prezidenta Francyi Fransua Ałanda, kanclera Hiermanii Anhieły Mierkiel, karala Maroka Muchamada VI i ciapier užo byłoha karala Ispanii Chuana Karłasa I.
Nahadajem, u krasaviku minułaha hoda niekalki «sekstremistak» zdoleli prarvacca praz aharodžu da realnaha Pucina i Mierkiel, jakaja supravadžała jaho, na pramysłovaj vystavie ŭ Hanoviery, ahalilisia pa pojas i stali vykrykvać niecenzurnyja łozunhi na anhlijskaj movie.
Dziaŭčat tady chutka skruciła achova, a Pucin, kamientujučy hety incydent, spačatku skazaŭ, što akcyja jamu spadabałasia, choć jon nie pačuŭ, što kryčali napaŭhołyja aktyvistki i navat nie razhledzieŭ koler ich vałasoŭ. Adnak krychu paźniej Pucin vykazaŭsia ŭžo pa-inšamu, pierafrazavaŭšy repliku adnaho ź piersanažaŭ kultavaha savieckaha filma «Bumbaraš»: «Kali b jany mnie, jak kažuć, kaŭbasu pakazali ci sała, heta b mianie paradavała, a tyja formy, jakija jany demanstrujuć — nie vielmi».
Kamientary