Deutsche Bank pieravioŭ układańni z Rasii ŭ Polšču

Niemcy skaracili dolu Rasiei ŭ svaim partfieli amal na tracinu. Paśla rasprodažu rasijskich papier srodki byli pieraraźmierkavany ŭ pieršuju čarhu na karyść Polščy.

Adzin z fondaŭ Deutsche Bank skaraciŭ dolu Rasiei ŭ svaim partfieli amal na tracinu, paličyŭšy, što navat niestabilnaja ekanomika Turcyi ciapier ŭjaŭlaje bolšuju cikavaść dla inviestaraŭ, paviedamiŭ RBK. Macniej za ŭsio fond rasčaravaŭsia ŭ rasijskim naftahazavym i bankaŭskim siektarach.

Pradać Rasiju

Fond DWS Central Europe, Russia and Turkey, jaki naležyć Deutsche Bank, u pieršym paŭhodździ 2014 finansavaha hoda, jaki skončyŭsia 30 krasavika, źniziŭ dolu rasijskich akcyj u svaim partfieli bolš čym na 30%, da 49,5%.

Skaracić dolu fond prymusili padziei, jakija adbylisia za apošnija paŭhoda (makraekanamičnyja pakazčyki, sankcyi, uviedzienyja suprać Rasiei, i pahrozy ich pašyreńnia, a taksama «razmytyja» pierśpiektyvy rasijskaha fondavaha rynku), paviedamlajecca ŭ spravazdačy fondu. «Paśla ŭvarvańnia Rasii na Krymski paŭvostraŭ rasijski fondavy rynak, kali mierkavać pa indeksie MMVB, asieŭ na 23%, a rubiel za spravazdačny pieryjad abiasceniŭsia na 10%», — adznačyŭ mieniedžmient fondu ŭ svaim liście akcyjanieram. Niepryjemnym siurpryzam stali i tempy ekanamičnaha rostu. «Rasieja moža sutyknucca z realnaj ryzykaj techničnaj recesii, u toj čas jak hłabalnaja ekanomika praciahvaje paskarać svoj rost», — adznačana ŭ spravazdačach.

Za pieršaje paŭhodździe (z 1 listapad 2013 hoda pa 30 krasavika 2014 hoda) čystyja aktyvy fondu patańnieli na 16,53%, što źviazana sa stratami na rasijskim rynku.

Kudy syšli hrošy

Srodki DWS paśla rasprodažu rasijskich papier byli pieraraźmierkavany ŭ pieršuju čarhu na karyść Polščy, dola jakoj u partfieli vyrasła z 11,4 da 20,5%. Bolš pryvabnym, čym rasijski rynak, mieniedžary fondu paličyli i rynak akcyj Hrecyi, jaki, pa ich nazirańniach, adnaŭlajecca. Navat Turcyja, niahledziačy na napružanuju palityčnuju situacyju i čakańni źnižeńnia tempaŭ rostu VUP u 2014, vyhladaje bolš pryvabna, čym Rasija.

«Nielha skazać, što Turcyja i Polšča vyhladajuć našmat macniejšymi z punktu hledžańnia makraekanomiki, ale z punktu hledžańnia palityčnych ryzyk jany adnaznačna bolš pryvabnyja», — adznačyŭ hałoŭny ekanamist finansavaj hrupy BKS Uładzimir Cichamiraŭ. Dla zachodniaha fondu pahroza sankcyj vychodzić na pieršy płan, tamu taki chod vyhladaje łahičnym, dadaŭ jon.

Biez bankaŭ i nafty

Prykmietniej za ŭsio za spravazdačny pieryjad fond skaraciŭ inviestycyi ŭ naftahazavy siektar, jaki ŭ kastryčniku minułaha hoda składaŭ 32,6% partfiela, u krasaviku 2014 — užo 25,4%. U pryvatnaści, DWS pamienšyŭ pazicyi ŭ Hazpromie, pradaŭ amal pałovu svaich akcyj «Tatnafty», skaraciŭšy ŭkładańni ŭ 2,5 razy. DWS taksama skaraciła ŭkładańni ŭ rasijski bankaŭski siektar, pazbaviŭšysia ad akcyj TKS-banka i VTB i amal u dva razy pamienšyŭšy dolu ŭ Aščadbanku. Na 31 kastryčnika inviestycyi fondu (pa biahučym košcie) u rasijskija papiery składali 308 młn dalaraŭ, na 30 krasavika — užo 152 młn. «Skazać, što kampanii hetych siehmientaŭ niepryvabnyja, nielha, heta najbolš likvidnyja papiery na rasijskim rynku, cikavyja i ŭ płanie dyvidendaŭ, i ŭ płanie rostu. Ale ŭ toj ža čas naftahazavy i bankaŭski siektary znachodziacca pad bolšaj pahrozaj z punktu hledžańnia sankcyj, tamu ŭsie znoŭ zvodzicca da palityčnaj ryzyki», — patłumačyŭ Uładzimir Cichamiraŭ.

Inviestary sychodziać z Rasii

U kancy traŭnia kiraŭnik fondaŭ rynkaŭ BlackRock kazaŭ, što jany pradali ŭsio ŭkładańni ŭ rasijskija ablihacyi — na sotni miljonaŭ dalaraŭ. U pieršym kvartale hetaha hoda fondy Oppenheimer International Bond Fund (OIBF) i Oppenheimer Global Strategic Income Fund (OGSIF), jakija ŭvachodziać u hrupu Oppenheimer (adzin z najbujniejšych zamiežnych inviestaraŭ u rasijskija kaštoŭnyja papiery), pradali kala 70% rasijskich kaštoŭnych papier, jakija naležali im, skaraciŭšy ŭkładańni na 700 młn dał.

Taksama ŭ pieršym kvartale dolu Rasii skaracili fond Templeton Russia and East European Fund (Templeton Russia) pad kiraŭnictvam Marka Mobiusa — da 46% ad čystych aktyvaŭ fondu z 61% u kancy 2013 hoda. Pry hetym fond pavialičyŭ ŭkładańni ŭ Rumyniju, Polšču i Turcyju.

• 0
• 0
• 0
• 0
• 0
• 0
• 0
• 0