Siarhiej Kalakin: Heta vydumka! Nichto nie źviartaŭsia da mianie z prapanovaj padtrymać «ŁNR» i «DNR»
U apošnim numary drukavanaha orhana KPB «Kamunist Biełarusi» źmieščany artykuł «Kalakin i DNR: vatniki ŭstupajuć u «SS»? Aŭtaram materyjała vystupiŭ adkazny sakratar haziety, małady litaratar Andrej Łazutkin. I choć u zahałoŭku źmieščany pytalnik, u samim materyjale nijakich sumnievaŭ u aŭtara niama. Darečy, charakternaja i nazva rubryki «Lico oppozicii».
Łazutkin abvinavačvaje lidara Biełaruskaj partyi levych «Spraviadlivy śviet» Siarhieja Kalakina ŭ tym, što jon zabaraniaje svaim adnapartyjcam vykazacca ŭ padtrymku samaabvieščanych «DNR» i «ŁNR». Łazutkin havoryć navat ab mahčymym raskole ŭnutry «Spraviadlivaha śvietu».
My źviazalisia ź Siarhiejem Kalakinym, kab jon prakamientavaŭ hety materyjał u haziecie «Kamunist Biełarusi». «Vydumka. Nichto ź siabroŭ partyi nie źviartaŭsia da mianie z prapanovaj padtrymać «DNR» i «ŁNR». A ja,naturalna, nie nakładaŭ nijakaje vieta na abmierkavańnie hetaj temy na plenumach».
Redaktar sajta «Tovariŝ online» Dźmitryj Janienka kaža, što tema Ukrainy nieadnarazova abmiarkoŭvałasia na plenumach «Spraviadlivaha śvietu». «Usie, chto chacieŭ, toj vykazaŭsia pa temie, - kaža Janienka. – I tym bolš nijakich čystak nie płanujecca».
U materyjale Łazutkina śćviardžajecca, što «Spraviadlivy śviet», u adroźnieńni ad KPB, nie zrabiŭ nivodnaj zajavy pa situacyi va Ukrainie, ale heta zusim nie adpaviadaje praŭdzie. «Partyja vitaje jak ŭkrainski suvierenitet i palityčny kantrol ŭkrainskaha dziaržavy nad usioj jaje terytoryjaj, tak i pradastaŭleńnie žycharam asobnych rehijonaŭ Ukrainy pravy na samakiravańnie va ŭmovach decentralizacyi ŭłady i kulturna-moŭnuju samabytnaść », - vykazvalisia biełaruskija levyja ŭ svajoj zajavie.
Była i jašče adna zajava «Spraviadlivaha śvietu» pa Ukrainie. «Ukrainskaja trahiedyja pavinna stać surjoznym urokam dla biełaruskich uładaŭ i hramadzian Biełarusi. Imknieńnie vyrašyć isnujučyja ŭ krainie prablemy z dapamohaj siłavych mietadaŭ — heta šlach da nacyjanalnaj katastrofy. Biełaruskaja partyja levych «Spraviadlivy śviet» vystupaje za toje, kab naśpieŭšyja ŭ Biełarusi pieramieny adbylisia mirnym šlacham», — padkreślena ŭ zajavie partyi.
Jašče adno abvinavačvańnie Łazutkina hruntujecca na tym, što Kalakin i kampanii bajacca vykazacca ŭ padtrymku Kamunistyčnaj partyi Ukrainy. Ale litaralna dźvie pstryčki ŭ google dazvalajuć pierakanacca, što heta nie tak. Małavierahodna, što Łazutkin nie ŭmieje karystacca pošukavymi sistemami ŭ internecie.
«Biezumoŭna, heta palityčnaje rašeńnie, absalutna pravavoje, zroblenaje pad palityčnuju situacyju. Hety vypadak kaža ab tym, što tyja, chto maje bolšaść u Viarchoŭnaj Radzie, chto kiruje Ukrainaj, dalokija ad jeŭrapiejskich, demakratyčnych kaštoŭnaściaŭ, da jakich jany tak imknucca», — havaryłasia ŭ zajavie Kalakina z nahody rospusku frakcyi KPU ŭ Viarchoŭnaj Radzie Ukrainy. Pry hetym varta nahadać, što ŭ Kalakina i Simanienki nie samyja ciopłyja adnosiny.
«U cełym u partyi jość roznyja mierkavańni pa padziejach va Ukrainie, jak i ŭ biełaruskim hramadstvie, - kaža «NN» Siarhiej Kalakin. – Ja nie viedaju dziela čaho źjaviŭsia hety materyjał. Mahčyma, heta taki zvanočak pierad prezidenckimi vybarami. Chacia tema Ukrainy davoli ślizkaja, tamu niechta sprabuje zarabić sabie ŭ hetym punkty».
Kamientary