«Čarnobylski šlach — 2015» projdzie pad łozunham «Nie — rasijskaj jadziernaj pahrozie»

Vuličnaja akcyja «Čarnobylski šlach», jakaja štohod pravodzicca demakratyčnymi siłami 26 krasavika, projdzie pad łozunham «Nie — rasijskaj jadziernaj pahrozie», paviedamiŭ adzin z zajaŭnikaŭ mierapryjemstva, staršynia Partyi BNF Alaksiej Janukievič 10 krasavika na pres-kanfierencyi ŭ Minsku.

U Minharvykankam padadzienaja zajaŭka na praviadzieńnie akcyi ŭ nastupnym farmacie: zbor kala kinateatra «Kastryčnik» z 14.00 da 15.00 i šeście pa vulicy Surhanava da carkvy ŭ honar abraza Božaj Maci «Spatoleńnie zahinułych», raźmieščanaj pobač z parkam Družby Narodaŭ. Pad zajaŭkaj padpisalisia Janukievič, sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski, pieršy namieśnik staršyni ruchu «Za Svabodu» Juryj Hubarevič, namieśnik staršyni Biełaruskaj partyi «Zialonyja» Dźmitryj Kučuk i aktyvist ruchu salidarnaści «Razam» Ilja Dabratvor.

Mitynh sioleta inicyjatary akcyi vyrašyli nie pravodzić. «Takoje rašeńnie pryniataje ŭ suviazi z tym, što minułyja hady milicyja pieraškadžała pranosić na mitynh hukaŭzmacnialnuju aparaturu, a samo miesca praviadzieńnia mitynhu było aharodžanaje i nie ŭsie ŭdzielniki mierapryjemstva chacieli prachodzić praceduru nadhladu», — skazaŭ Janukievič.

Kučuk nazvaŭ łozunh akcyi «vielmi aktualnym». «Budaŭnictva AES u Biełarusi viadzie rasijskaja kampanija «Rasatam». Jakaść hetaha budaŭnictva vyklikaje sumnieńnie», — ličyć jon.

«Z Rasii hučać zajavy, što jana hatovaja prymianiać jadziernuju zbroju. Heta niebiaśpiečna nie tolki dla Biełarusi, ale i ŭsiaho śvietu», — dadaŭ Dabratvor.

Rymašeŭski akcentavaŭ uvahu na palitycy ŭładaŭ, jakaja dazvalaje zasiejvać ziemli, zabrudžanyja paśla vybuchu na Čarnobylskaj AES. «Kali ŭłady ličać heta narmalnym, to niachaj pieraniasuć svaje damy ŭ Brahin i Naroŭlu, pabudujuć sabie zony adpačynku i «azdaraŭlajucca» tam sa svaimi dziećmi», — adznačyŭ jon, paviedamiŭšy, što arhkamitet BCHD rychtuje adpaviedny zvarot da ŭładaŭ.

Hubarevič padkreśliŭ, što siońniašnija ŭłady i ludziej, jakija byli va ŭładzie ŭ hod avaryi na ČAES, abjadnoŭvaje «niepadkantrolnaść hramadstvu i abyjakavaść».

«Čarnobylski šlach» — vuličnaja akcyja, jakuju biełaruskaja apazicyja pravodzić u Minsku štohod z 1988 hoda ŭ farmacie šeścia i zaviaršalnaha mitynhu. Vyklučeńniem byŭ 2011 hod, kali staličnyja ŭłady zabaranili šeście, daŭšy dazvoł tolki na praviadzieńnie mitynhu.

• 0
• 0
• 0
• 0
• 0
• 0
• 0
• 0