Lidery pradprymalnickaha ruchu praviali pres‑kanferencyju. Hałoŭnyja jaje mety — ćviaroza zirnuć na padziei studzienia, a taksama raspavieści pra plany pierad akcyjaj 18 lutaha.
«Siońnia nas, lideraŭ pradprymalnickaha ruchu, sprabujuć sutyknuć iłbami, niejak pasvaryć. Ale va ŭładaŭ heta nie atrymajecca», — skazaŭ staršynia kampanii «Za svabodnaje raźvićcio pradprymalnictva» Viktar Harbačoŭ.
Pavodle jahonych słovaŭ, na siońniašni dzień pa krainie nie pracujuć 40 % indyvidualnych pradprymalnikaŭ. Pryčyna — nia tolki strajk, častka pieraafarmlaje dakumenty, inšyja źbirajucca źjaždžać u Rasieju, kab praciahvać biznes tam. Harbačoŭ miarkuje, što 15‑20% drobnych handlaroŭ mohuć užo nia viernucca da svajoj pracy. Byŭ pryviedzieny cikavy momant: u metro, na radyjo i telebačańni ciapier idzie reklama arendy handlovych kropak na Kamaroŭskim rynku. Pryčym, patencyjnym ułaśnikam abiacajuć 30 % źnižku. Raniej prosta tak trapić na Kamaroŭku było amal niemahčyma.
Patrabavańni pradprymalnikaŭ zastajucca raniejšymi: admiena ŭkazu prezydenta № 760; pryniaćcio zakonu ab małym biznesie; spynić pieraśled pradprymalnickich lideraŭ. Mienavita pad takimi lozunhami i pavinna prajści akcyja 18 lutaha, jakaja pačniecca a 12:00 na Kastryčnickaj płoščy.
Aleś Makajeŭ prapanuje radykalny metad zmahańnia za svaje pravy: «Treba stavić namioty na Kastryčnickaj płoščy, i stajać da toj pary pakul ułady nia pojduć na sastupki».
Pavodle jahonaj infarmacyi na 16‑17 lutaha ŭsich pradprymalnikaŭ Homielščyny vyklikajuć u padatkovyja słužby. «Nia vyklučana, što ŭsim im prapanujuć padpisacca pad tym, što 18‑ha ŭ Miensk jany nie pajeduć», — ličyć A.Makajeŭ.
Viktar Harbačoŭ maje źviestki, što ŭ milicyi jość raznaradka na preventyŭnyja zatrymańni ŭsich pradprymalnickich lideraŭ pierad akcyjaj 18 lutaha.
«Siońnia možna havaryć upeŭniena, što pradprymalniki buduć udzielničać u parlamenckich vybarach. Pryčym, nia tolki, jak siabry čyichści vybarčych hrup, ale i jak kandydaty. Siońnia my majem niekalki mocnych kandydataŭ sa svaimi kamandami, jakija pazmahajucca za miesca ŭ parlamencie. Chaču taksama paviedamić, što bolšaść drobnych handlaroŭ u rehijonach hatovaja padtrymać akcyju na Dzień Voli», — kaža V.Harbačoŭ.
Staršynia arhkamitetu pa stvareńni pradprymalnickaha prafsajuzu «Razam» Mikałaj Ramašyn ličyć, što ź IP moža skłaścisia takaja ž sytuacyja, što z budaŭnikami, jaki masava źjaždžajuć na zarobki ŭ Rasieju.
Pradprymalnik z Vuzdy Viktar Kryval kaža, što ŭładam niejak atrymałasia źbić pieršuju pratestnuju chvalu.
«Ciapier moža pačacca druhaja chvala. Na rynkach prachodziać pravierki, ludziej abkładajuć ovymi padatkami, tamu druhaja chvala maje šaniec na pieramohu», — miarkuje V.Kryval.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary