U Maładziečnie adkryvajecca XV Nacyjanalny fiestyval biełaruskaj pieśni i paezii

5 červienia adkryvajecca XV Nacyjanalny fiestyval biełaruskaj pieśni i paezii «Maładziečna».

Padčas fiestyvalu, jaki budzie prachodzić u Maładziečnie pa 7 červienia, adbuducca kancerty biełaruskich artystaŭ i kalektyvaŭ mastackaj samadziejnaści, a taksama konkurs maładych estradnych vykanaŭcaŭ. Dziesiacihodździe tvorčaj dziejnaści adznačyć u miežach fiestyvalu muzyčny prajekt «Zorny dyližans». 

Uračystaje adkryćcio mierapryjemstva adbudziecca siońnia na scenie Letniaha amfiteatra.

U kancercie-adkryćci «Biełaruś niezaležnaja ŭ pieśniach i vieršach» voźmuć udzieł biełaruskija kampazitary, paety, viadomyja vykanaŭcy, u tym liku narodnyja artysty Biełarusi Jadviha Papłaŭskaja, Alaksandr Cichanovič, Anatol Jarmolenka, zasłužanyja artysty Biełarusi Ina Afanaśjeva, Iryna Darafiejeva, Alena Łanskaja, zasłužany artyst BSSR Leanid Bartkievič, Biełaruski dziaržaŭny ansambl «Pieśniary», ansambl «Siabry», art-hrupa «Biełarusy», a taksama Viktoryja Aleška, Alaksandr Saładucha, Anastasija Cichanovič. 

«Naš kancert-adkryćcio maje, jak mnie zdajecca, niekalki admietnych momantaŭ.

Pa-pieršaje, upieršyniu ŭ im udzielničajuć i čytajuć kłasičnuju biełaruskuju paeziju dramatyčnyja akciory takoha ranhu, jak narodny artyst Biełarusi Viktar Manajeŭ, Valancina Harcujeva, Pavieł Charłačnuk-Južakoŭ, — raskazała BiełaPAN redaktar kancerta Ludmiła Pałkoŭnikava.

— Pa-druhoje, da rajala buduć vychodzić kampazitary, taksama pradstaviać publicy paetaŭ — aŭtaraŭ słoŭ piesień. Imiony aŭtaraŭ piesień buduć nie tolki hučać, ale i demanstravacca na ekranie ŭ videaradzie. Heta daść mahčymaść publicy zapomnić imiony tvorcaŭ. Śpiecyjalna da kancerta padrychtavany duety, trya, i viadomyja pieśni buduć hučać pa-novamu». 

U druhi fiestyvalny dzień, 6 červienia, Nacyjanalny akademičny kancertny arkiestr Biełarusi pad kiraŭnictvam Michaiła Finbierha zaprašaje hledačoŭ na III tur respublikanskaha etapu Nacyjanalnaha konkursu maładych vykanaŭcaŭ biełaruskaj estradnaj pieśni. U hety dzień adbudziecca cyrymonija ŭznaharodžańnia łaŭreataŭ konkursu. 

Arhanizatary abiacajuć, što jarkaj padziejaj zaklučnaha dnia XV Nacyjanalnaha fiestyvalu biełaruskaj pieśni i paezii «Maładziečna» stanie jubilejny aŭtarski kancert «Pieśnia maja…» kampazitara Aleha Mołčana. Pavinšavać maestra z 50-hodździem i praśpiavać jaho chity na scenu vyjduć narodnyja artysty Biełarusi Jadviha Papłaŭskaja, Alaksandr Cichanovič, Mikałaj Skorykaŭ, zasłužany artyst BSSR Anatol Kašaparaŭ, a taksama BDA «Pieśniary», łaŭreat Nacyjanalnaj muzyčnaj premii Iryna Vidava, artysty ansambla «Pieśniary» roznych hadoŭ. 

U hety ž dzień adznačyć 10-hodździe muzyčny prajekt «Zorny dyližans». Papularnyja artysty Dźmitryj Kałdun, Hierman, hurt IOWA, trya «Inžyr», Mikita Faminych, Dzianis Lis, Alena Piščykava, karjera jakich pačynałasia ŭ «Zornym dyližansie», taksama vystupiać u Maładziečnie.

• 0
• 0
• 0
• 0
• 0
• 0
• 0
• 0