Polskaha žurnalista «Radyjo Racyja» Radasłava Dambroŭskaha nie puścili na terytoryju Biełarusi pamiežniki, patłumačyŭšy heta tym, što jon znachodzicca «ŭ śpisie nieŭjaznych u Biełaruś».
«Kalekcyja raście. Vasiamnaccać miesiacaŭ tamu ja nie atrymaŭ vizu. Siońnia ja chacieŭ u družnym kalektyvie žurnalistaŭ i amataraŭ turyzmu skarystacca prapanavanym biaźvizavym pierasiačeńniem miažy ŭ Biełaviežskaj puščy. Takim čynam, nie majučy padobnaha namieru, ja staŭ pieršym u historyi biaźvizavaha režymu čałaviekam, jakomu było admoŭlena va ŭjeździe ŭ Respubliku Biełaruś. Štamp jasnaha i sakavitaha koleru», – napisaŭ Radasłaŭ Dambroŭski na svajoj staroncy ŭ Facebook.
Dambroŭski nakiroŭvaŭsia ŭ Biełaviežskuju Pušču razam z hrupaj polskich žurnalistaŭ i turystaŭ. Varta nahadać, što z 12 červienia ŭ Biełaviežskaj puščy dziejničaje adnabakovy biaźvizavy režym. Hramadzianie krain Jeŭrapiejskaha Sajuza mohuć naviedać biełaruskuju častku Biełaviežskaj puščy i znachodzicca na jaje terytoryi nie bolš za 3 dni, papiarednie atrymaŭšy dazvoł i vykupiŭšy kvitki najmienš na dźvie turystyčnyja prapanovy.
Ale siońnia ŭžo ź pieršaj hrupy turystaŭ, jakija vyrašyli skarystacca heta ščodraj prapanovaj Biełarusi, adzin čałaviek nie atrymaŭ dazvołu na pierasiačeńnie biełaruskaj miažy. Što dziŭna, pa słovach «Radyjo Racyja», papiarednie turbiuro, jakoje arhanizoŭvała ekskursiju, paviedamlała, što z ujezdam na terytoryju Biełarusi prablem być nie pavinna.
«Papiarednie turbiuro, jakoje arhanizavała siońnia pieršuju histaryčnuju – jak tut jaje ŭžo nazvali – ekskursiju, afarmlała propuski ad Biełaviežskaj puščy, jakija dajuć mahčymaść ujezdu ŭ Biełaruś da troch dzion bieź vizy. I na hetym etapie ničoha nie było skazana pra toje, što va ŭjeździe admoŭlena. Choć viedaju, što Biełaviežski nacyjanalny park ź biełaruskaha boku kansultuje papiarednija propuski z pamiežnaj achovaj. Tamu biełaruskija pamiežniki nie mieli nijakich zaściarohaŭ. Ale siońnia padčas pravierki dakumientaŭ akazałasia, što ja – nieŭjazny, atrymaŭ piačatku «ŭjezd zabaronieny», – raskazaŭ paśla sam Radasłaŭ Dambroŭski.
Paśla hetaha vypadku žurnalist maje namier źviartacca ŭ biełaruskija dypłamatyčnyja orhany z prośbaj patłumačyć pryčynu zabarony ŭjezdu na terytoryju Biełarusi.
Ciapier čytajuć
Pamierła Śviatłana Kurs. U jaje tvorach spałučalisia mahija žyvoha žyćcia i biaźlitasny psichałahizm. A ŭ publičnych vystupach i FB — rezki antyimpieryjalizm i elehantny liryzm1818
Kamientary