Hibrałtar adkryŭ miažu ź Ispanijaj. Što heta aznačaje dla biełarusaŭ i ci patrebnaja ciapier brytanskaja viza

Hibrałtar — nievialikaja terytoryja płoščaj usiaho 6,8 kvadratnaha kiłamietra na poŭdni Pireniejskaha paŭvostrava. Jon pierajšoŭ pad kantrol Brytanii ŭ 1704 hodzie padčas Vajny za ispanskuju spadčynu, a ŭ 1713 hodzie Ispanija pryznała heta pavodle Utrechckaha mirnaha dahavora. Adnak Madryd nikoli nie admoviŭsia ad svaich pretenzij na terytoryju.

U 1969 hodzie režym Franka całkam zakryŭ suchaputnuju miažu. Jana adkryłasia tolki ŭ 1985 hodzie, pierad ustupleńniem Ispanii ŭ Jeŭrapiejskuju ekanamičnuju supolnaść.

Ale navat paśla hetaha pierachod praź miažu zaŭsiody supravadžaŭsia pašpartnym kantrolem.

Kali Vialikabrytanija vyjšła ź Jeŭrapiejskaha sajuza, Hibrałtar pakinuŭ ES razam ź joj.

Kab nie pieratvaryć hranicu ŭ adnu z samych žorstkich źniešnich miežaŭ Jeŭrasajuza, Łondan, Madryd, ułady Hibrałtara i Jeŭrakamisija niekalki hadoŭ viali pieramovy. Vynikam stała pahadnieńnie, časovaje prymianieńnie jakoha pačałosia 15 lipienia 2026 hoda.

Jak ciapier pracuje miaža

Pašpartny kantrol źnik z suchaputnaj miažy pamiž Ła-Liniejaj i Hibrałtaram.

Ciapier usie pravierki pieraniesieny ŭ aeraport i marski port Hibrałtara. Kali čałaviek prylataje siudy ź Vialikabrytanii abo prybyvaje moram, jon prachodzić dva kantroli — hibrałtarski i šenhienski, jaki ažyćciaŭlajuć supracoŭniki ispanskaj palicyi.

Pry hetym sam Hibrałtar nie staŭ častkaj šenhienskaj zony. Jon zastajecca brytanskaj terytoryjaj sa svaimi zakonami i orhanami ŭłady, ale ŭjezd arhanizavany pavodle novych pahadnieńniaŭ pamiž ES i Vialikabrytanijaj.

Što heta aznačaje dla biełarusaŭ

Kali jość šmatrazovaja šenhienskaja viza — možna ŭjechać u Hibrałtar z boku Ispanii biez dadatkovaj brytanskaj vizy.

Toje ž datyčyć uładalnikaŭ nacyjanalnaj vizy D luboj krainy šenhienskaj zony.

Kali jość dazvoł na žycharstva abo PMŽ krainy šenhienskaj zony — taksama možna svabodna naviedać Hibrałtar.

Kali jość tolki brytanskaja turystyčnaja viza — hetaha ŭžo niedastatkova. Paśla źmieny pravił jana bolš nie daje prava na ŭjezd u Hibrałtar.

Kali jość časovy abo pastajanny vid na žycharstva ŭ Vialikabrytanii — sam pa sabie jon taksama nie daje prava na ŭjezd. Kab trapić u Hibrałtar, patrebna dziejnaja šmatrazovaja šenhienskaja viza abo dazvoł na žycharstva krainy šenhienskaj zony.

Kali padarožničajecie pa prajaznym dakumiencie (Travel Document) — usio zaležyć ad taho, chto jaho vydaŭ i jaki status jon paćviardžaje. Kali dakumient vydadzieny krainaj šenhienskaj zony razam z pravam na pražyvańnie, ujezd mahčymy. Sam pa sabie prajazny dakumient biez prava na ŭjezd u krainy šenhiena takoha prava nie daje.

Kali majecie abo afarmlajecie rezidenctva Hibrałtara — dla vas dziejničajuć asobnyja praviły, jakija nie raspaŭsiudžvajucca na zvyčajnyja turystyčnyja pajezdki.

Ci ŭličvajecca čas, praviedzieny ŭ Hibrałtary?

Tak.

Choć Hibrałtar farmalna nie staŭ členam šenhienskaj zony, paśla ŭstupleńnia ŭ siłu novaha pahadnieńnia na jaho raspaŭsiudžvajucca praviły karotkaterminovaha znachodžańnia, jakija dziejničajuć u šenhienie. Heta aznačaje, što dla hramadzian trecich krain, u tym liku biełarusaŭ, dni, praviedzienyja ŭ Hibrałtary, uličvajucca ŭ ahulny limit — 90 dzion na praciahu lubych 180 dzion.

Naprykład, kali vy praviali 20 dzion u Ispanii, potym 5 dzion u Hibrałtary, a paśla jašče 10 dzion u Ispanii, to ŭ ahulny limit budzie zaličana 35 dzion.

Pravieryć, ci patrebnaja vam viza, jakija dakumienty nieabchodnyja dla ŭjezdu i na jaki termin možna znachodzicca ŭ Hibrałtary, možna na aficyjnym sajcie Pamiežnaj i bierahavoj słužby Hibrałtara — www.gibraltarborder.gi/visa. Dastatkova vybrać krainu svajho hramadzianstva, paśla čaho sistema pakaža aktualnyja patrabavańni dla ŭjezdu.

Dzie jašče dziejničajuć padobnyja praviły

Padobnaja situacyja jość u niekalkich jeŭrapiejskich mikradziaržavach, jakija farmalna nie ŭvachodziać u šenhienskuju zonu, ale majuć adkrytyja miežy z susiednimi krainami.

Adzin z najbolš pakazalnych prykładaŭ — Andora. Jana nie ŭvachodzić ni ŭ Jeŭrasajuz, ni ŭ šenhienskuju zonu, ale trapić tudy možna tolki praź Ispaniju abo Francyju. U Andory niama ŭłasnaha aeraporta, tamu padarožnik spačatku pavinien lehalna ŭjechać u šenhien, a ŭžo adtul — pa sušy — u Andoru. Pastajannaha pamiežnaha kantrolu na hetych pierachodach niama.

Padobny režym dziejničaje ŭ Manaka, jakoje faktyčna maje adkrytuju miažu z Francyjaj, a taksama ŭ San-Maryna i Vatykanie, kudy možna svabodna trapić z terytoryi Italii. Usie hetyja krainy farmalna nie źjaŭlajucca častkaj šenhienskaj zony, ale na praktycy dostup da ich zaležyć ad taho, ci maje padarožnik prava znachodzicca ŭ susiedniaj šenhienskaj krainie.

Što budzie z duty free

Kramy duty free ŭ Hibrałtary nie źniknuć i praciahnuć pracavać, u tym liku na hałoŭnaj handlovaj vulicy Main Street. Turysty pa-raniejšamu zmohuć kuplać tam ałkahol, tytuniovyja vyraby, parfumu, elektroniku i inšyja tavary.

Adnak hałoŭnaja pieravaha Hibrałtara — značna nižejšyja ceny ŭ paraŭnańni ź Ispanijaj — budzie pastupova źmianšacca. Novyja praviły praduhledžvajuć uviadzieńnie ŭskosnaha padatku i pavyšeńnie akcyzaŭ na tytuń, ałkahol i paliva da ŭzroŭniu, bližejšaha da jeŭrapiejskaha.

• 3
• 0
• 0
• 0
• 0
• 0
• 0
• 2