Michalevič: Ja viarnuŭsia, bo chaču być sa svajoj siamjoj, chaču žyć u adzinaj rodnaj dla siabie krainie

«Naša Niva» źviazałasia z Alesiem Michalevičam, jaki na dadzieny momant znachodzicca ŭ Astraŭcy. Ź Minska pa jaho vyjechaŭ namieśnik kiraŭnika Ruchu «Za Svabodu» Juraś Hubarevič.

«Čamu ja viarnuŭsia? Bo chaču być sa svajoj siamjoj, chaču žyć u adzinaj rodnaj dla siabie krainie. Heta absalutna naturalnyja žadańni.

Ja šmat razoŭ kazaŭ, što viarnusia ŭ Biełaruś, kali ŭsie palitviaźni buduć na voli. Kali tolki Mikałaj Statkievič i astatnija vyjšli z turmy, ja pačaŭ źbiracca ŭ Biełaruś, ale niejki čas zaniało vyrašeńnie bytavych pytańniaŭ, zvalnieńnie z pracy ŭ Čechii.

Ciapier ja znachodžusia pad padpiskaj ab niavyjeździe, chacia samu padpisku ja nie padpisaŭ. Heta niejki nonsens. Atrymlivajecca, što raniej ja nie moh ujechać na terytoryju Biełarusi, a ciapier nie mahu vyjechać.

Siońnia ja byŭ hatovy da ŭsiaho. Byŭ hatovy jechać u turmu KDB, tak zvanuju amierykanku. Biełaruś — heta niepradkazalnaja kraina, tut možna čakać čaho zaŭhodna.

Toje, što mianie adpuścili, stała niečakanym i vielmi pryjemnym siurpryzam. Ja čuŭ, što za mnoj ź SIZA vyjechała mašyna ź Minska. I mianie pieradaduć Śledčamu kamitetu».

Michalevič kaža, što nie viedaje, chto moh pryniać rašeńnie adpuścić jaho: «Ja nie byŭ u Biełarusi 4,5 hoda, ja nie viedaju jak ciapier pracuje siłavy miechanizm. Pachadžu na dopyty, ubaču».

Pakul Aleś nie adkazvaje naŭprost, ci źbirajecca jon viartacca ŭ palityku. «Hałoŭny płan u mianie — viarnucca dadomu, da žonki, da dziaciej, da samych lubimych u maim žyćci ludziej».

Jak ža razhortvałasia žyćcio Alesia Michaleviča siońnia i apošnija piać hadoŭ?

«Viartajusia ŭ Biełaruś. Šmat razoŭ kazaŭ, što viarnusia ŭ Biełaruś adrazu, jak vypuściać asnoŭnych palitźniavolenych (dumaŭ pra Bialackaha i Statkieviča). Jany na svabodzie. Pierasiakaju miažu Biełarusi, viedaju, što mianie aryštujuć, bo zastajusia apošnim abvinavačvanym pa spravie ab «masavych biesparadkach» 2010 hoda, jakuju Śledčy kamitet admaŭlajecca začyniać», — napisaŭ jon u svaim fejsbuku.

Apošniaje paviedamleńnie tam jon raźmiaściŭ a 8.25 ź Litvy.

A ŭžo a 9.00 źjaviłasia paviedamleńnie, što Michaleviča zatrymali na miažy.

Aficyjna jon zastavaŭsia ŭ vyšuku pa spravie ab «biesparadkach» 19 śniežnia 2010 hoda, choć spravy suprać astatnich fihurantaŭ, jakija atrymali palityčny prytułak za miažoj, daŭno byli spynieny. Vykazvałasia mierkavańnie, što tak Michaleviču pomściŭ KDB za vykryćci katavańniaŭ u turmie Kamiteta ŭ Minsku.

Ciahnik Vilnia—Minsk mieŭ prybyć u Minsk a 10.30. Apošniaje paviedamleńnie ad Alesia pryjšło, kali jon znachodziŭsia na pašpartnym kantroli ŭ Hudahai.

Ab zatrymańni paviedamiła jaho žonka Miłana ŭ fejsbuku. Jon paśpieŭ patelefanavać žoncy sa svajho češskaha numara ŭžo z kabinieta pamiežnikaŭ. «Ja ŭžo zatrymany, užo ŭ kabiniecie pamiežnikaŭ, usio, bolš nie mahu havaryć», — skazaŭ jon joj. Miłana skazała «Našaj Nivie», što viarnucca było ćviordym i pryncypovym rašeńniem Alesia. Jana nie biarecca prahnazavać, jak budzie dalej raźvivacca situacyja.

«Čarhovaje chadajnictva ab zakryćci spravy było dasłanaje ŭ Śledčy kamitet u minuły paniadziełak», — raskazała «Našaj Nivie» Miłana Michalevič.

A 10.20 aficyjny pradstaŭnik Dziaržpamiežkamiteta Biełarusi Alaksandr Ciščanka paviedamiŭ: «Michalevič zatrymany jak asoba, jakaja znachodzicca ŭ vyšuku. Jon budzie pieradadzieny supracoŭnikam MUS».

«Mianie viazuć z Hudahaja ŭ Astraviecki RAUS, i tam užo buduć rašać moj dalejšy los», — paviedamiŭ «Našaj Nivie» Aleś Michalevič a 10.59 praz telefon.

Narešcie, kala 15.00 Alesia Michaleviča adpuścili z Astravieckaha RAUS «bieź źmieny miery strymańnia».

Heta značyć, jurydyčna jon budzie zastavacca pad padpiskaj ab niavyjeździe, pry tym što padpiski jon nie davaŭ. 

Aleś Michalevič udzielničaŭ u prezidenckich vybarach 2010 hoda. 19 śniežnia, paśla akcyi apazicyi jon byŭ zatrymany, pravioŭ u śledčym izalatary KDB kala dvuch miesiacaŭ, abvinavačvaŭsia pa kryminalnaj spravie «arhanizacyja masavych biesparadkaŭ». Paśla vyzvaleńnia ź SIZA pad padpisku ab niavyjeździe Michalevič pravioŭ pres-kanfierencyju, na jakoj paviedamiŭ, što ŭmovaj jahonaha vyzvaleńnia stała dadzienaje pad katavańniami zhoda na nastupnaje supracoŭnictva sa śpiecsłužbami. Praź niekalki dzion Michalevič tajemna pakinuŭ Biełarusi i paprasiŭ palityčnaha prytułku ŭ Čechii.

Siamja palityka, žonka i dvoje dačok, zastavalisia ŭ Biełarusi, choć mahli b uźjadnacca z mužam i atrymać palityčny prytułak.

• 0
• 0
• 0
• 0
• 0
• 0
• 0
• 0