Chryścijanie, jakija žyvuć u Siryi, rezka niehatyŭna vykazalisia ab niadaŭnim vystupie aficyjnaha pradstaŭnika Ruskaj pravasłaŭnaj carkvy, u jakim toj nazvaŭ avijaŭdary, jakija nanosiacca rasijskimi VPS, častkaj śviatoj baraćby.
«Baraćba z teraryzmam, za spraviadlivy śviet, za hodnaść ludziej, jakija adčuvajuć vyklik teroru, — heta vielmi maralnaja, heta, kali chočacie, śviataja baraćba, i siońnia naša kraina źjaŭlajecca, napeŭna, samaj aktyŭnaj ŭ śviecie siłaj, jakaja supraćstaić teroru», — zajaviŭ raniej žurnalistam kiraŭnik sinadalnaha adździeła pa ŭzajemadziejańni carkvy i hramadstva Maskoŭskaha patryjarchatu protaijerej Usievaład Čaplin.
Taksama śviatar padkreśliŭ, što Rasija zaŭsiody hrała «asablivuju rolu» na Blizkim Uschodzie.
Adzin ź lidaraŭ siryjskaj chryścijanskaj carkvy, biskup Iljas Tuma zajaviŭ u adkaz na heta vykazvańnie: «Nie moža być u chryścijanstvie nijakaj śviatoj vajny! Niezaležna ad taho, zhodny niechta z hetym ci nie».
Jašče adzin siryjski śviatar, Iśpirydon Tanus, zajaviŭ u intervju sajtu Suriyat, što Rasija hulaje z ahniom: «Pakutniki ŭ našaj carkvie nie stanuć mučanikami vajny, jany — achviary vajny».
U toj ža samy čas viadučy panarabskaha spadarožnikavaha telekanała «Al-Džazira» Fiejsał al-Kasim napisaŭ na svajoj staroncy ŭ tvitary: «Kali Ruskaja carkva apisvaje rasijskuju interviencyju ŭ Siryi jak śviatuju vajnu, jana tym samym mižvoli zaklikaje musulman na džychad».
Mnohija kamientatary-chryścijanie ŭ sacsietkach taksama vykazali hnieŭ u suviazi sa słovami pres-sakratara RPC. «Niechryścijanskija i nieetyčnyja zajavy Ruskaj carkvy nie adlustroŭvajuć ni pohladaŭ chryścijan Uschodu, ni chryścijanstva naohuł. Davajcie budziem pamiatać, što ideja «śviatoj vajny» pryjšła ad zachodnich kryžakoŭ», — napisaŭ u fejsbuku Nadžyb Hieorh Avad.
«My, chryścijanie Blizkaha Uschodu, vierym u śviaty mir i suisnavańnie», — dadaŭ jon.
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska3
Kamientary