21 sakavika ŭ sudzie Zavodskaha rajona Minska abvieščany prysud pa spravie ab karupcyjnych złačynstvach u dačynieńni da byłoha dyrektara instytuta «Biełčyhunkaprajekt» Mikałaja Nikiciuka.
Jak paviedamili ŭ sudzie, pa sukupnaści złačynstvaŭ Nikiciuk pryhavorany da 11 hadoŭ pazbaŭleńnia voli z kanfiskacyjaj majomaści i pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych funkcyj, terminam na piać hadoŭ. Adbyvać pakarańnie jon budzie ŭ papraŭčaj kałonii va ŭmovach ŭzmocnienaha režymu.
Jakaja dakładna suma budzie spahnanaja z abvinavačanaha ŭ vyhladzie kampiensacyi niezakonna nabytaj vyhady, zaraz ustanaŭlivajecca.
Nahadajem, zhodna ź viersijaj śledstva, abvinavačany ŭ 2012—2014 hadach, vykarystoŭvajučy svaje słužbovyja paŭnamoctvy, nieadnarazova davaŭ padnačalenym supracoŭnikam ŭkazańni ab zaklučeńni jaŭna niavyhadnych kantraktaŭ z kamiercyjnymi strukturami, što paciahnuła pryčynieńnie ŭronu dziaržaŭnamu pradpryjemstvu bolš jak na 9 młrd rubloŭ.
Za hetyja dziejańniaŭ, što vyjavilisia ŭ zastupnictvie i spryjalnym vyrašeńni pytańniaŭ, słužbovaja asoba patrabavała i paśla atrymała ad kiraŭnikoŭ nazvanych struktur niezakonnyja hrašovyja ŭznaharodžańni bolš jak na 160 tys. dołaraŭ ZŠA.
Padčas śledstva było zabiaśpiečanaje pakryćcio škody šlacham nakładańnia aryštu na majomaść abvinavačanaha na ahulnuju sumu bolš za 19 młrd rubloŭ.
Na padstavie sabranych dokazaŭ byłomu dyrektaru pradpryjemstva śledstvam było vystaŭlenaje abvinavačańnie na padstavie č. 3 art. 424 (złoŭžyvańnie słužbovymi paŭnamoctvami, jakoje paciahnuła ciažkija nastupstvy ŭ vyhladzie naniasieńnia ŭronu ŭ asabliva bujnym pamiery) i č. 3 art. 430 (atrymańnie chabaru ŭ bujnym pamiery) KK.
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja6
Kamientary