Pieršaja dziaržaŭnaja haścinica dla žyvioł adkryjecca ŭ lipieni

Pieršaja dziaržaŭnaja haścinica dla žyvioł adkryjecca ŭ Minsku da siaredziny lipienia, paviedamili karespandentu ahienctva «Minsk-Naviny» ŭ HP «Faŭna horada».

Jak patłumačyła dyrektar «Faŭny horada» Tamara Carykoŭskaja, ustanova, raźmieščanaja na skryžavańni vuł. Bryla i vuł. Hurskaha, całkam padrychtavana, vyznačany taryfy na pražyvańnie i štatny raskład. Płanujecca, što prymać pastajalcaŭ tut zmohuć užo na nastupnym tydni.

— Hatel składajecca z 36 kacinych i 32 sabačych standartnych numaroŭ. Plus 4 VIP-pakoi płoščaj pa 14 kv. m. kožny, kudy možna razam z hadavancam źmiaścić usiu jaho ŭlubionuju abstanoŭku až da kanapy i televizara. U standartnyja numary haspadary taksama mohuć prynieści lubimyja miski, cacki, lažanki i inšyja asabistyja rečy hadavancaŭ, — nahadała T. Carykoŭskaja.

Što tyčycca taryfaŭ, sutki pražyvańnia kata ŭ standartnym numary abyducca ŭładalniku ŭ 12 rubloŭ 71 kapiejku. Płata za sabak dyfierencyravanaja i zaležyć ad pamieraŭ žyvioły. Načleh dla čaćvieranohaha drobnaj parody kaštuje 14 rubloŭ 67 kapiejek, siaredniaj — 16 rubloŭ 30 kapiejek, bujnoj — 18 rubloŭ 33 kapiejki. Numar VIP kaštuje 24 rubli 64 kapiejki ŭ sutki. Košty paznačany biez uliku charčavańnia.

Haspadaru pry zaklučeńni damovy treba vyznačycca, jak karmić hadavanca. Možna pryvieźci svoj korm albo za asobnuju płatu rabotniki haścinicy buduć hatavać naturalnuju ježu pa žadańni ŭładalnika abo kuplać ukazany haspadarom suchi korm.

Pry zasialeńni ŭ hatel z uładalnikam hadavanca budzie zaklučana damova. Na kožnaha čaćvieranohaha pastajalca zaviaduć kartku — svojeasablivaje daśje ź infarmacyjaj pra zvyčki, stan zdaroŭja, asablivaści dohladu i inšymi źviestkami. Pasłuhi hatel pradastavić tolki pry 100%-naj pieradapłacie.

Dyrektar «Faŭny horada» źviartaje ŭvahu na nastupnaje: kab pasialić hadavanca ŭ haścinicu, patrebien jaho vietpašpart z ukazańniem usich pryščepak. Heta abaviazkovaja ŭmova, bo havorka idzie pra zdaroŭje ŭsich pastajalcaŭ. Taksama dla zaklučeńnia damovy nieabchodny pašpart haspadara.

Zapisvać svajho čatyrochnohaha siabra ŭ hatel pakul možna pa numarach «Faŭny horada»: 256-17-73 i 256-17-00. Na nastupnym tydni ŭ haścinicy pavinien źjavicca asobny numar telefona. U štacie ŭstanovy budzie 12 supracoŭnikaŭ, u tym liku — dva vieterynary.

U budynku buduć arhanizavany kinałahičnyja kursy dla ŭładalnikaŭ sabak, tut stanuć vyrablać i pradavać naturalny korm dla žyvioł. Taksama ŭ haścinicy buduć akazvać vieterynarnyja pasłuhi i pasłuhu paślaapieracyjnaj pieratrymki hadavancaŭ u asobnym pakoi.

Nahadajem, uźviadzieńnie abjekta pačałosia kala 10 hadoŭ tamu. Jaho adkryćcio nieadnarazova anansavałasia, ale pieranosiłasia.

• 0
• 0
• 0
• 0
• 0
• 0
• 0
• 0