Abranyja staršyni pastajannych kamisij Pałaty pradstaŭnikoŭ

Deputaty Pałaty pradstaŭnikoŭ šostaha sklikańnia na pasiadžeńni 13 kastryčnika abrali staršyniaŭ pastajannych kamisij.

Pa vynikach hałasavańnia staršyniami parłamienckich kamisij stali:

pa zakanadaŭstvie — Natalla Hujvik (papiaredniaja pasada — člen kamisii pa zakanadaŭstvie Pałaty pradstaŭnikoŭ piataha sklikańnia; za jaje abrańnie prahałasavali 106 deputataŭ, suprać — 3);

pa dziaržaŭnym budaŭnictvie, miascovym samakiravańni i rehłamiencie — Leanid Cupryk (namieśnik staršyni Bresckaha abłvykankama; 102 i 7 adpaviedna);

pa nacyjanalnaj biaśpiecy — Valancin Michnievič (pieršy namieśnik ministra ŭnutranych spraŭ — načalnik kryminalnaj milicyi; 104 i 4);

pa ekanamičnaj palitycy — Uładzisłaŭ Ščepaŭ (namieśnik staršyni kamisii pa ekanamičnaj palitycy Pałaty pradstaŭnikoŭ piataha sklikańnia; 106 i 2);

pa biudžecie i finansach — Ludmiła Dabrynina (staršynia hetaj ža kamisii ŭ Pałacie pradstaŭnikoŭ piataha sklikańnia; 107 i 2);

pa ahrarnaj palitycy — Jaŭhien Adamienka (staršynia Mazyrskaha rajonnaha vykanaŭčaha kamiteta; 108 i 1);

pa pytańniach ekałohii, pryrodakarystańnia i čarnobylskaj katastrofy — Taćciana Kanančuk (namieśnik staršyni hetaj ža kamisii ŭ Pałacie pradstaŭnikoŭ piataha sklikańnia; 108 i 1);

pa pravach čałavieka, nacyjanalnych adnosinach i srodkach masavaj infarmacyi — Andrej Navumovič (staršynia hetaj ža kamisii ŭ Pałacie pradstaŭnikoŭ piataha sklikańnia; 104 i 5);

pa adukacyi, kultury i navucy — Ihar Marzaluk (člen Savieta Respubliki piataha sklikańnia, zahadčyk kafiedry archieałohii i śpiecyjalnych histaryčnych dyscyplin UA «MDU imia A.A.Kulašova»; 102 i 6);

pa pracy i sacyjalnych pytańniach — Tamara Krasoŭskaja (namieśnik staršyni kamisii pa pravach čałavieka, nacyjanalnych adnosinach i srodkach masavaj infarmacyi Pałaty pradstaŭnikoŭ piataha sklikańnia; 107 i 2);

pa achovie zdaroŭja, fizičnaj kultury, siamiejnaj i maładziožnaj palitycy — Ludmiła Makaryna-Kibak (dyrektar DU «Respublikanski navukova-praktyčny centr otarynałarynhałohii»; 105 i 3);

pa žyllovaj palitycy i budaŭnictvie — Juryj Darahakupiec (člen hetaj ža kamisii ŭ Pałacie pradstaŭnikoŭ piataha sklikańnia; 108 i 1);

pa pramysłovaści, paliŭna-enierhietyčnym kompleksie, transparcie i suviazi — Andrej Rybak (namieśnik hienieralnaha dyrektara pa kamiercyjnych pytańniach i łahistycy — načalnik upraŭleńnia prodažaŭ i łahistyki AAT «Biełaruśkalij»; 107 i 1);

pa mižnarodnych spravach — Valeryj Varaniecki (pasoł Biełarusi ŭ Aŭstryi i Charvatyi pa sumiaščalnictvie, pastajanny pradstaŭnik Biełarusi pry mižnarodnych arhanizacyjach u Vienie i pry ABSIE; 107 i 2).

Usie staršyni kamisij byli abranyja ŭ vyniku tajnaha hałasavańnia na biezalternatyŭnaj asnovie. Pracedura vyłučeńnia kandydataŭ na pasadu staršyniaŭ kamisij zaniała bolš za dźvie z pałovaj hadziny i prachodziła pa nastupnaj schiemie: prapanova ab vyłučeńni na pasadu, vystupleńnie pretendenta i adno-dva vystupleńni ŭ padtrymku jaho vyłučeńnia. Za ŭvieś čas vyłučeńnia kandydataŭ na pasadu staršyniaŭ kamisij pretendentam było zadadziena tolki adno pytańnie ad Hanny Kanapackaj. Jak paviedamlałasia raniej, jana padniała pytańnie ab svabodnym i roŭnym dostupie da infarmacyi pierad pretendentam na pasadu staršyni kamisii pa pravach čałavieka, nacyjanalnych adnosinach i ŚMI Andrejem Navumovičam.

• 0
• 0
• 0
• 0
• 0
• 0
• 0
• 0