28 listapada ŭ Kijevie pa spravie ab rasstrele pratestoŭcaŭ na Majdanie ŭ kancy 2013 hoda pa videasuviazi dapytvajuć eks-prezidenta Ukrainy Viktara Janukoviča, jaki znachodzicca ŭžo amal try hady ŭ Rasii.
Dazvoł na dopyt daŭ Rastoŭski sud. Akramia źbiehłaha prezidenta pakazańni daść taksama były kamandujučy ŭnutranymi vojskami MUS Ukrainy Stanisłaŭ Šulak.
U paniadziełak, 28 listapada, u Śviatašynski rajsud Kijeva pieciarych padazravanych u rasstrele aktyvistaŭ Jeŭramajdana byłych supracoŭnikaŭ śpiecpadraździaleńnia «Bierkut» dastavili zahadzia, piša TUT.BY.
U pačatku pasiadžeńnia hienieralny prakuror Ukrainy Jury Łucenka začytaŭ Viktaru Janukoviču apaviaščeńnie ab padazreńni ŭ dziaržaŭnaj zdradzie. Jon paviedamiŭ, što paviedamleńnie nakiravana ŭ Rasiju, a taksama pra toje, što nieŭzabavie apaviaščeńnie pieratvorycca ŭ abvinavačańnie.
«Uličvajučy toje, što Janukovič znachodzicca za miežami Ukrainy i faktyčna chavajecca ad pravaachoŭnych orhanaŭ Ukrainy, źmiest padazreńnia abvieščany vusna, a samo paviedamleńnie ab padazreńni siońnia razasłana na ŭsie viadomyja adrasy znachodžańnia Janukoviča», — skazaŭ jon.
Paśla čaho Łucenka dadaŭ, što jak hramadzianin Ukrainy jon abvinavačvaje Janukoviča ŭ raźviazvańni vajny na terytoryi krainy.
Viktar Janukovič pryniaŭ prysiahu ŭ Rastoŭskim sudzie. Jon zajaviŭ, što maje ŭkrainskaje hramadzianstva, budzie mieć znosiny z sudom na ŭkrainskaj movie, a taksama nie byŭ pryciahnuty da kryminalnaj adkaznaści. Miesca pražyvańnia eks-prezident nie raskryŭ u metach biaśpieki.
Były kiraŭnik dziaržavy zajaviŭ, što stralba pa ludziach na Majdanie — spłanavanaja akcyja źviaržeńnia ŭłady va Ukrainie. Na jaho dumku, treba ŭ adnoj spravie razhladać zabojstva nie tolki pratestantaŭ, ale i pravaachoŭnikaŭ. Jon zajaviŭ, što kali b u 2013 hodzie była padpisanaja asacyjacyja ź ES, tady b intaresy Ukrainy paciarpieli. Pra heta ž eks-prezident raspaviadaŭ i na pres-kanfierencyi ŭ piatnicu.
Nahadajem, papiaredniaja sproba dopytu 25 listapada była sarvanaja praz zatrymku z dastaŭkaj u sud abvinavačanych pa spravie — bajcoŭ śpiecpadraździaleńnia «Bierkut». Zryŭ mierapryjemstva Janukovič nazvaŭ «sprobaj schavać praŭdu».
Ciapier čytajuć
Mužčyna ŭ minskim mietro łapaŭ dziaŭčat, z vyhladu padletkaŭ, i pakazvaŭ im pachabnyja žesty. Jaho zatrymali2
Kamientary