Navukoŭcy: žančyny dasiahajuć «krytyčnaj kropki» fiertylnaści prykładna ŭ 49 hadoŭ

Doŭhi čas u repraduktyŭnaj miedycynie ličyłasia, što hałoŭnaja pryčyna ŭzrostavaha źnižeńnia fiertylnaści — stareńnie jajcakletak. Tamu vykarystańnie donarskich jajcakletak ad maładych žančyn razhladałasia jak sposab u peŭnaj stupieni abyści bijałahičny hadzińnik.

Adnak novaje daśledavańnie italjanskich śpiecyjalistaŭ, vyniki jakoha byli pradstaŭleny na štohadovym kanhresie Jeŭrapiejskaha tavarystva repradukcyi čałavieka i embryjałohii (ESHRE) śviedčyć, što ŭsio značna składaniej. Jano pakazvaje, što z uzrostam paharšajecca nie tolki jakaść jajcakletak, ale i stan samoj matki, jakaja pavinna pryniać i zabiaśpiečyć raźvićcio embryjona.

Što pakazała daśledavańnie

Navukoŭcy praanalizavali vyniki lačeńnia 1774 žančyn, jakija prachodzili ekstrakarparalnaje apładnieńnie (EKA) z vykarystańniem donarskich jajcakletak.

Siarod žančyn va ŭzroście 35‑40 hadoŭ ciažarnaść paśla takoj pracedury nastupała ŭ 54% vypadkaŭ. U žančyn, jakim było 49 hadoŭ i bolš, hety pakazčyk źnižaŭsia prykładna da 43%.

Jašče bolš prykmietnaj była roźnica ŭ kolkaści vypadkaŭ, jakija zakančvalisia naradžeńniem žyvoha dziciaci. Kali ŭ hrupie 35‑40 hadoŭ heta adbyvałasia ŭ 46% pracedur, to ŭ žančyn va ŭzroście 49 hadoŭ i bolš — u 32%.

Adnačasova ŭzrastała i ryzyka straty ciažarnaści. U žančyn paśla 49 hadoŭ vykidyšy adbyvalisia ŭ 38% vypadkaŭ suprać 24% u hrupie 35‑40 hadoŭ.

Pry hetym, kali ŭličyć pieranos usich atrymanych embryjonaŭ, vierahodnaść naradžeńnia žyvoha dziciaci składała kala 80% u žančyn 35‑40 hadoŭ i 62,5% u žančyn va ŭzroście 49 hadoŭ i bolš.

Sprava nie tolki ŭ jajcakletkach

Aŭtary daśledavańnia ličać, što pryčyna kryjecca va ŭzrostavych źmienach endamietryja — ślizistaj abałonki matki, u jakoj zamacoŭvajecca embryjon i raźvivajecca ciažarnaść.

Taŭščynia endamietryja ŭ žančyn roznych uzrostavych hrup amal nie adroźnivałasia, adnak jaho funkcyjanalny stan paharšaŭsia z uzrostam. Mienavita heta, na dumku daśledčykaŭ, moža tłumačyć, čamu navat vykarystańnie maładych donarskich jajcakletak nie dazvalaje całkam pieraadoleć nastupstvy stareńnia repraduktyŭnaj sistemy.

Aŭtary daśledavańnia padkreślivajuć, što hetyja vyniki nie pavinny adbivać u žančyn žadańnie źviartacca da donarskich jajcakletak. Efiektyŭnaść takoha lačeńnia zastajecca davoli vysokaj navat u starejšym uzroście. Adnak pacyjentki pavinny razumieć, što hetaja mietodyka nie moža całkam kampiensavać uzrostavyja źmieny repraduktyŭnaj sistemy, asabliva paśla 49 hadoŭ.

Čamu heta važna

Daśledčyki spadziajucca, što ŭ budučyni ŭdasca raspracavać sposaby, jakija dazvolać prahnazavać, praduchilać abo źmianšać nastupstvy stareńnia matki. Heta moža zrabić lačeńnie biaspłodździa bolš efiektyŭnym.

Niezaležnyja ekśpierty zaklikajuć nie ŭsprymać 49 hadoŭ jak absalutnuju miažu. Jany padkreślivajuć, što stan matki i jaječnikaŭ u roznych žančyn adnaho ŭzrostu moža istotna adroźnivacca, tamu kožny vypadak patrabuje indyvidualnaj acenki.

Adna z pacyjentak, brytanka Šeron Maršał, raskazała BBC, što naradziła dačku ŭ 46 hadoŭ paśla šaści hadoŭ biespaśpiachovych sprob EKA. Da hetaha jana dvojčy straciła ciažarnaść i zmahła zaciažaryć tolki ź siomaj sproby.

Pavodle jaje, historyi znakamitaściaŭ, jakija naradžajuć dziaciej paśla 45 ci navat 50 hadoŭ, stvarajuć uražańnie, što zrabić heta adnosna prosta. Nasamreč ža mnohija žančyny prachodziać praz hady lačeńnia, niaŭdałyja sproby i ciažkija psichałahičnyja pieražyvańni.

«Davajcie budziem ščyrymi z žančynami nakont taho, ź jakimi ciažkaściami jany mohuć sutyknucca i nakolki składana moža być zaciažaryć u starejšym uzroście. My zasłuhoŭvajem taho, kab viedać pra heta», — skazała jana.

• 1
• 0
• 0
• 0
• 1
• 1
• 0
• 0