Łukašenka: U Biełarusi zatrymali bajevikoŭ, što rychtavali pravakacyju sa zbrojaj

U Biełarusi zatrymali bajevikoŭ sa zbrojaj, jakija rychtavali pravakacyju. Ab hetym paviedamiŭ Alaksandr Łukašenka siońnia ŭ čas razmovy ŭ Mahilovie z pracoŭnymi kalektyvami pradpryjemstvaŭ kampanii «Kronaspan».

Adkazvajučy na pytańnie adnaho z rabotnikaŭ pra pryčyny aktyvizacyi ŭ apošni čas tak zvanaj piataj kałony i roznych apazicyjnych struktur, kiraŭnik dziaržavy skazaŭ: «Jak pakazała rečaisnaść, jany nie spali (asobnyja), jany pacichu rychtavalisia na vypadak, vybirali momant».

«Jany nie tolki nie spali. My ŭžo niekalki dziasiatkaŭ zatrymali (nie tych, što ŭ aŭtobusach, anarchistaŭ z maskami), jakija treniravalisia ŭ łahierach z zbrojaj. Darečy, adzin z łahieraŭ byŭ u rajonie Babrujska i Asipovičaŭ. Astatnija łahiery — va Ukrainie. pa-mojmu, u Litvie ci ŭ Polščy (nie budu śćviardžać, ale niedzie tam), — skazaŭ Alaksandr Łukašenka. — Hrošy išli praz Polšču i Litvu da nas. My litaralna ŭ hetyja hadziny zatrymali paru dziasiatkaŭ bajevikoŭ, jakija rychtavali pravakacyju sa zbrojaj».

Jon adznačyŭ, što paśla hramadskaści budzie pradstaŭlena bolš šyrokaja infarmacyja ab dadzienym fakcie.

Jon taksama raspavioŭ pra toje, jak pravaachoŭnikam udałosia daviedacca pra isnavańnie padobnych płanaŭ. «Dziakuj, što jość biełarusy i biełaruski sapraŭdnyja, jakija byŭšy za miažoj — u Jeŭrasajuzie — papiaredzili nas.

Žančyna pryjšła ŭ pasolstva i papiaredziła, aficyjna napisała list: rychtujecca pravakacyja. I my pačali raźbiracca. I sapraŭdy vyjšli na vielmi cikavyja rečy», — skazaŭ Alaksandr Łukašenka.

Pavodle słoŭ kiraŭnika krainy, ciapier treba budzie detalova razabracca, adkul pastupali hrošy, chto zajmaŭsia padrychtoŭkaj, ź jakich krain pryjechali adpaviednyja ludzi.

Jon padkreśliŭ, što ŭ Biełarusi zaŭsiody hatovyja spyniać lubuju supraćpraŭnuju dziejnaść i bandytyzm. «Biełarusy chočuć žyć spakojna i hadavać dziaciej. Nikomu heta vajna nie patrebna, i ja jaje dapuścić nie mahu. Treba budzie - u pieršym šerahu pajdu z usimi blizkimi i rodnymi. Ale krainu my na źniavahu nikomu nie addamo», - reziumavaŭ biełaruski lidar.

Nahadajem, što pierad prezidenckimi vybarami 2015 hoda dziaržaŭnyja ŚMI zajaŭlali sa spasyłkaj na Pahraničny kamitet, što «na miažy zatrymali 200 ukraincaŭ sa zbrojaj». Paźniej u Pamiežnym kamitecie admaŭlalisia kamientavać hetuju infarmacyju i los nibyta «zatrymanych», jakich narodu tak i nie pakazali. Anałahičnaha charaktaru zajavy hučali i pierad masavymi pratestami 2006 i 2010 hadoŭ. Ni razu paśla dziaržaŭnyja ŚMI nie apublikavali abviaržeńnia infarmacyi, što akazałasia niepraŭdzivaj.

• 0
• 0
• 0
• 0
• 0
• 0
• 0
• 0