Łukašenka anansavaŭ sumiesnyja z Ukrainaj humanitarnyja kanvoi na Danbas

Prezident Ukrainy Piatro Parašenka pryniaŭ prapanovu Alaksandra Łukašenki ab adpraŭcy sumiesnych humanitarnych kanvojaŭ na Danbas biez pasiarednikaŭ «pa najkarotkim šlachu». Pra heta kiraŭnik Biełarusi zajaviŭ pa vynikach sustrečy z Parašenkam, piša Tut.by.

Pavialičyć

Łukašenka adznačyŭ, što kiraŭniki niamała času abmiarkoŭvali situacyju ŭ Danieckaj i Łuhanskaj abłaściach Ukrainy.

— Pierš za ŭsio, ja Piatru Alaksiejeviču pra heta skazaŭ i paprasiŭ jaho, my pastaŭlajem humanitarnuju dapamohu ŭ hetyja vobłaści. My chacieli b pracavać tam biez pasrednikaŭ i pa najkarotkim šlachu. I prasiŭ, što kali budzie cikavaść niejkaja i ŭ nas supaduć hetyja humanitarnyja kanvoi, kab my heta zrabili razam. Ludzi ž našy, dzialić nam niama čaho. Ja ŭdziačny prezidentu i jaho kaleham, jakija pahadzilisia na hety krok. My ŭ stanie svaim ludziam (ja nie liču ich čužymi) dapamahać, chto trapiŭ u biadu».

Kiraŭnik Biełarusi dadaŭ, što jaho pazicyja ŭ dačynieńni da kanfliktu va Ukrainie nie źmianiłasia.

— Ja nikoli nie staviŭ pierad saboj metu biehčy napieradzie paravoza. Ja rabiŭ, rablu i budu rabić tolki toje, ab čym mianie paprosiać dva prezidenty, — zajaviŭ Łukašenka, majučy na ŭvazie kiraŭnikoŭ Rasii i Ukrainy. — Usio, što daručać mnie dva prezidenty, bolš, čym chto-niebudź uciahnutyja ŭ hety kanflikt, my, biełarusy, budziem rabić. My nie pretendujem ni na jakija łaŭry. Jakija mohuć być łaŭry, kali hinuć ludzi?! Vy — ukraincy, pavinny viedać, što ŭ vas jość blizkija i rodnyja ludzi, jakija žyvuć trochi bolš na poŭnač, ale ničym nie adroźnivajucca ad vas. I kali vam ciažka, u čym tolki zmožam, my zaŭsiody dapamožam.

U svaju čarhu, Parašenka nazvaŭ Łukašenku «dobrym siabram, jaki zaŭsiody hatovy nas padtrymać». Pa słovach prezidenta Ukrainy, jon u čarhovy raz atrymaŭ zapeŭnivańni, što terytoryja «siabroŭskaj Biełarusi nikoli nie budzie vykarystanaja dla ahresii suprać Ukrainy».

Parašenka dadaŭ, što jany z Łukašenkam damovilisia zabiaśpiečyć na ŭmovach uzajemnaści znachodžańnie ukraincaŭ u Biełarusi biez rehistracyi na toj ža termin, što i biełarusy mohuć znachodzicca va Ukrainie.

— Heta ziamla družby. Biełarusam va Ukrainie i ŭkraincam u Biełarusi pavinna być kamfortna.

Sumiesnaj demarkacyjnaj kamisii daručyli zaviaršyć praces dahavorna-pravavoha afarmleńnia miažy Biełarusi i Ukrainy, adznačyŭ Parašenka. U bližejšy čas pastaŭlenaja zadača vyjści na 5 młrd dalaraŭ tavaraabarotu.

Baki damovilisia stvarać sumiesnyja pradpryjemstvy dla vytvorčaści ŭsich mahčymych tavaraŭ dla ekspartu ŭ trecija krainy.

Biełaruś i Ukraina taksama padpisali prahramu supracoŭnictva pamiž krainami ŭ śfiery kultury na 2017-2021, u śfiery mižnacyjanalnych adnosin, pahadnieńnie ab navukovym supracoŭnictvie pamiž nacyjanalnymi akademijami navuk.

• 0
• 0
• 0
• 0
• 0
• 0
• 0
• 0