Užo ŭ treci raz redakcyja dziciačaha pieryjadyčnaha vydańnia «Pałasataja hazieta» praviała dabračynnuju akcyju ŭ padtrymku dziaciej, jakija apynulisia letam u lačebnych ustanovach: Respublikanski apiokavy centr, Respublikanski navukova-praktyčny centr traŭmatałohii i artapiedyi, Respublikanski navukova-praktyčny centr dziciačaj ankałohii, hiematałohii i imunałohii ŭ Baraŭlanach, Adździaleńnia praciahłaha znachodžańnia ŭ dziciačych balnicach Hrodna, Homiela, Bresta, Viciebska, Mahilova, Minska, Babrujska, Oršy, Mazyra.
IBA aktyŭna ŭziała ŭdzieł u akcyi, vykupiŭšy častku nakładu haziety. Supracoŭniki kampanii razam z «Pałosačkaj» napisali i adpravili karocieńkija zapiski z dobrymi słovami i pažadańniami chutčejšaha vyzdaraŭleńnia dzieciam, jakija znachodziacca na lačeńni. Im i byli ŭručany śviežyja numary dziciačaj haziety z zapiskami. Zapiskami ad zusim nieznajomych ludziej, jakija praniklisia supieražyvańniem da dziatvy, jakaja vymušana pravieści vakacyi nie na morach-dačy, a siarod balničnych ścien. Tamu ŭ pasłańniach ŭtrymlivalisia prostyja sardečnyja słovy padtrymki i zusim siabroŭskija podpisy, naprykład: «Ź ciepłynioj, ad babuli Soni», «My trymajem za ciabie kułački i łapki, ciotka Ina i kot Śniadanak», «Mocna abdymaju, dziadźka Saša»…
Hanna Hranoŭskaja, hałoŭny redaktar «Pałasataj haziety», paviedamiła, što zajaŭlenyja 1170 numaroŭ haziety adpraŭlenyja dzieciam u balnicy.
Dziakujučy ščyrym pažadańniam adbyvajucca cudoŭnyja historyi. Voś adna ź ich, raspaviadaje Hranoŭskaja: «U Baraŭlanach, u ankałohii, zapiska ad cioci Ryty, jakaja pačynajecca sa słoŭ «Dziaŭčynka maja, pryhažunia…», trapiła da dziaŭčynki Dašy. Prybiehła razhublenaja mama da psichołaha Centra, pytajecca: «A chto takaja ciocia Ryta, u mianie dzicia uśmichajecca!» Dziaŭčynka prachodzić ciažki kurs chimijaterapii, jaje naohuł ničoha nie radavała…»
Hanna Hranoŭskaja sardečna padziakavała IBA Group za ŭdzieł u akcyi, a taksama pieradała słovy ŭdziačnaści ad supracoŭnikaŭ miedycynskich ustanoŭ.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary