31 studzienia ŭ mnohich rasijskich i ukrainskich ŚMI źjaviłasia cytata staršyni Dziaržaŭnaha vajskova-pramysłovaha kamiteta Biełarusi Aleha Dźvihalova.
Toj zajaviŭ, što vajskova-techničnaje supracoŭnictva z Ukrainaj spynienaje, «kab nie było lišnich prablem i pytańniaŭ», bo Biełaruś źjaŭlajecca pieramoŭnaj placoŭkaj pa ŭrehulavańni kanflikta na uschodzie Ukrainy.
Ale ŭ Dziaržaŭnym vajskova-pramysłovym kamitecie Biełarusi nie razumiejuć, adkul taki ažyjataž vakoł pytańnia. Bo infarmacyja nasamreč zusim nie novaja.
«Vajskova-techničnaje supracoŭnictva było spyniena jašče ŭ 2014 hodzie. Prodaž techniki va Ukrainu spyniŭsia, jak tolki ukrainskaje kiraŭnictva pačało antyterarystyčnuju apieracyju», — patłumačyli ŭ Dziaržvajenpramie.
Kolki hrošaj zhubiła praz heta Biełaruś i što kankretna pastaŭlali susiedziam, u Dziaržvajenpramie nie paviedamili — heta infarmacyja dla słužbovaha vykarystańnia.
Ale jašče ŭ 2016 hodzie žurnalisty «Dojče vele» adznačali, što pastaŭki ź Biełarusi va Ukrainu da pačatku vajny na Danbasie ŭklučali ŭ siabie avijacyjnaje paliva i haruča-zmazačnyja materyjały, kamplektujučyja dla aŭtatechniki, optyka, sistemy naviadzieńnia rakiet. Taksama ŭ Oršy ramantavali ŭkrainskija viertaloty.
Kamientary