Pasažyrski samalot An-148 «Sarataŭskich avijalinij» vylecieŭ z Maskvy ŭ Orsk u Arenburhskaj vobłaści. Na borcie znachodzilisia 65 pasažyraŭ i šeść členaŭ ekipaža. Praź niekalki chvilin paśla ŭźlotu samalot źnik z ekranaŭ radaraŭ. Zahinuŭ 71 čałaviek.
Abłomki samalota znajšli ŭ Ramienskim rajonie Padmaskoŭja.
Viadoma, što An-148 vylecieŭ z aeraporta Damadziedava ŭ 14:21 pa maskoŭskim časie. Praz usiaho niekalki chvilin ekipaž pierastaŭ vychodzić na suviaź z dyśpietčaram.
Nie viadoma, ci paviedamlaŭ piłot An-148 ab niaspraŭnaści. «Hazieta.Ru» sa spasyłkaj na ananimnuju krynicu śćviardžała, što piłot paśpieŭ paviedamić hetyja dadzienyja avijadyśpietčaru i nibyta pavinien byŭ avaryjna pasadzić samalot u Žukoŭskim. Adnak pres-słužba aeraporta Žukoŭski paviedamili, što jaho dyśpietčary takich zapytaŭ nie atrymlivali.
Nieŭzabavie paśla krušeńnia ŚMI źviarnuli ŭvahu na dziŭnyja dadzienyja palotu An-148, jakija zafiksavaŭ sajt Flightradar.
Spačatku samalot nabraŭ vyšyniu ŭ 1800 mietraŭ i lacieŭ z chutkaściu 600 kiłamietraŭ u hadzinu. Ale potym raptam spačatku źniziŭsia da vyšyni 1500 mietraŭ, zatym znoŭ padniaŭsia da 1800 mietraŭ, paśla čaho, miarkujučy pa ŭsim, pačaŭ padać. Na adznacy ŭ 900 mietraŭ jon źnik z ekranaŭ radaraŭ.
Napačatku krynicy Interfaksa paviedamili, što An-148 nibyta sutyknuŭsia ź viertalotam «Pošty Rasii», ale ŭ kampanii heta nazvali pamyłkaj.
«Ruchaviki An-148 pracavali až da sutyknieńnia ź ziamloj, razbureńnie sudna adbyłosia ad udaru ab ziamlu», — adznačyŭ surazmoŭca RBK.
Na miescy była znojdziena varonka hłybinioj 2,5 mietra, dadała krynica. Pavodle jaje słoŭ, «ahlad ruchavika i elemientaŭ miechanizacyi kryła dazvalaje zrabić vysnovu, što samalot nie razburyŭsia ŭ pavietry».
Śledčyja razhladajuć usie mahčymyja viersii avijakatastrofy, paviedamiŭ raniej Śledčy kamitet. Krynica RBK, znajomaja z chodam rasśledavańnia, udakładniła, što taksama razhladajecca viersija teraktu.
«Hetaja viersija naŭrad ci budzie pryjarytetnaj, bo ekśpierty-vybuchatechniki, jakija praviali ekspres-analiz častki abłomkaŭ samalota nie znajšli na ich mikračaścinki vybuchovaha rečyva», — adznačyła krynica.
Siarod pasažyraŭ An-148 byli dzieci, a taksama troje zamiežnikaŭ. U Rasii abvieščany dzień žałoby.
Kamientary