Novaha namieśnika ministra achovy zdaroŭja znajšli ŭ Krymie, jon jość u bazie «Miratvorac»
50-hadovy Barys Andrasiuk pryznačany novym namieśnikam ministra achovy zdaroŭja. Da hetaha jon uznačalvaŭ sanatoryj «Biełaruśsija», jaki znachodzicca ŭ Krymie. Andrasiuk źmianiŭ zatrymanaha śpiecsłužbami namieśnika ministra Ihara Łasickaha, jaki praciahvaje znachodzicca ŭ SIZA.
Čynoŭnik rodam ź vioski Rasna Kamianieckaha rajona. Heta Biełaviežskaja pušča, da miažy z Polščaj usiaho siem kiłamietraŭ. U 1993 hodzie Andrasiuk skončyŭ Biełaruski dziaržaŭny miedycynski ŭniviersitet.
U pieršaj pałovie 2000-ch jon trapiŭ na pracu ŭ Ministerstva achovy zdaroŭja. Tam doŭhi čas zajmaŭ pasadu načalnika ŭpraŭleńnia miedstatystyki infarmacyjnych technałohij i spravavodstva.
Mienavita z hetaj pasady jaho pieraviali ŭ jałcinski sanatoryj «Biełaoruśsija». Heta było jašče da akupacyi Kryma.
Barys Andrasiuk znachodzicca va ŭkrainskaj bazie «Miratvorac». Tam jon maje nastupnuju charaktarystyku: «Śviadomaje parušeńnie dziaržaŭnaj miažy Ukrainy z metaj praniknieńnia ŭ akupavany Rasijaj Krym. Udzieł u prapahandysckich mierapryjemstvach Rasii. Udzieł u sprobach lehalizacyi aneksii Kryma».
Sprava ŭ tym, što na sajcie sanatoryja «Biełaruśsija», jaki naležyć Kiraŭnictvu spravami prezidenta, rekamiendujecca naviedvańnie ŭstanovy ŭ abychod Ukrainy, praz terytoryju Rasii. Admietna, što niejki čas na sajcie Kiraŭnictva spravami prezidenta było napisana, što sanatoryj znachodzicca ŭ Rasii. Paźniej heta vypravili.
U razmovach z žurnalistami Andrasiuk adznačaŭ, što «źmiena statusu» Kryma źmienšała kolkaść achvotnych azdaravicca ŭ «Biełaruśsii». Praŭda, dabirać źbiralisia za košt hramadzianaŭ Rasii.
«My viedajem, što i jak lačyć: u našym sanatoryi pracuje 14 daktaroŭ vuzkich śpiecyjalnaściaŭ», — kazaŭ Andrasiuk.
U vieraśni 2015 hoda Andrasiuk atrymaŭ hanarovuju hramatu i padziaku ad kiraŭnictva Jałty. Atrymlivaŭ jon i inšyja ŭznaharody ad krymskaha kiraŭnictva. Naprykład, za «dobrasumlennuju pracu i vysoki prafiesijanalizm» u Dzień narodnaha adzinstva Rasii.
U Krymie Andrasiuk naviedvaŭ biełaruskija mierapryjemstvy. Prynamsi byŭ na viečarynie, pryśviečanaj 125-hodździu z dnia naradžeńnia paeta Maksima Bahdanoviča.
U novaha namieśnika ministra jość syn Stanisłaŭ, jaki skončyŭ BNTU. Na svajoj staroncy Ukantakcie jon źmiaščaje niamała fatazdymkaŭ z adpačynku ŭ Krymie, ale nijakich palityčnych dopisaŭ ci repostaŭ niama.
Dačka Julija pajšła pa śladach baćki, jana navučajecca na piedyjatryčnym adździaleńni ŭ Mieduniviersitecie.
Stryječny brat Barysa Andrasiuka Siarhiej žyvie ŭ rasijskaj Tule. Tam jon adzin z najlepšych u horadzie trenieraŭ pa kikboksinhu.
Admietna, što sam namieśnik ministra karystajecca sacyjalnymi sietkami. Prynamsi ŭ jaho jość akaŭnt u instahramie, dzie Andrasiuk vykładaje nie tolki siabie, ale i zdymki pryrody.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary