U Kitai pošukavyja zapyty ŭ Google chočuć pryviazać da telefonnych numaroŭ
Pakul biełaruski Mininfarm płanuje pačać identyfikavać kamientataraŭ u internecie pa numary telefona, u Kitai vyrašyli pajści jašče dalej. Kampanija Google raspracoŭvaje pošukavik Dragonfly dla Android, jaki budzie błakavać zabaronienyja ŭ Kitai zapyty i pryviazvać infarmacyju pra dziejańni karystalnikaŭ da numaroŭ ich mabilnych telefonaŭ, paviedamlaje The Intercept.
Dragonfly zrobić mahčymaj cenzuru kantentu ŭ adpaviednaści z patrabavańniami kitajskaha ŭrada i dazvolić jamu kantralavać dziejańni karystalnikaŭ.
Pavodle krynicy, z pošukavych zapytaŭ budzie prybiracca infarmacyja, jakaja tyčycca palityčnych dysidentaŭ, svabody słova, demakratyi, pravoŭ čałavieka, mirnych pratestaŭ. Taksama Google stvaryła śpis z cenzuraj takich słoŭ na mandarynskaj movie, jak «pravy čałavieka», «studenckija pratesty», «Nobieleŭskaja premija».
Viadučyja pravaabarončyja arhanizacyi krytykujuć Dragonfly, śćviardžajučy, što takim čynam Google «spryjaje parušeńniam pravoŭ čałavieka». Danyja ad Google mohuć być dastupnymi dla ŭładaŭ Kitaja, dapamohuć im pieraśledavać palityčnych aktyvistaŭ i žurnalistaŭ.
Krynica ŭ kampanii taksama adznačyła, što Android-prahrama budzie pryviazvać pošukavyja zapyty da numaroŭ mabilnych telefonaŭ karystalnikaŭ. Heta dazvolić adsočvać ich dziejańni ŭ sietcy.
Google publična admachvajecca ad suviaziaŭ z cenzuraj Kitaja. Infarmacyja pra Dragonfly źjaviłasia šeść tydniaŭ tamu. Za hety čas kampanija, jak piša The Intercept, admoviłasia supracoŭničać u hetym pytańni z pravaabaroncami i nie adkazvaje na dziasiatki žurnalisckich zapytaŭ.
Kamientary