Svajaki 55 zahinułych pry krušeńni samalota Malaysia Airlines MH17 u 2014 hodzie nad Danbasam padali suprać Rasiei pazoŭ u Eŭrapiejski sud pa pravach čałavieka, paviedamlaje niderlandzkaje vydańnie NOS.
Praz paŭhoda paśla taho, jak mižnarodnyja śledčyja aficyjna abviaścili ab datyčnaści Rasiei da krušeńnia samalota, svajaki zapatrabavali ad Maskvy pryznacca ŭ złačynstvie i nie zaminać raśśledavańniu.
«Rasieja nie dała važnaj infarmacyi Mižnarodnaj hrupie śledčych. Bolš za toje, nadadzienyja [krainaj] fakty ŭ kančatkovym vyniku akazalisia iłžyvymi», — zajaviŭ advakat svajakoŭ.
Raniej ŭ 2016 hodzie svajaki achviar z Aŭstralii, Małajzii i Novaj Zelandyi padali ŭ sud na rasijanina i byłoha «ministra abarony» tak zvanaj «DNR» Ihara Strałkova (Hirkina). Svajaki abvinavacili Strałkova ŭ arhanizacyi pusku rakiety pa pasažyrskim samalocie. Jon, zhodna z pazovam, abo asabista kiravaŭ tymi, chto vypuściŭ rakietu, abo «spuściŭ źvierchu» taki zahad. Svajaki zahinułych śćviardžajuć, što Strałkoŭ udzielničaŭ u kanflikcie va Ŭkrainie «z bahasłavieńnia Kramla», taksama i ŭ toj čas, kali separatysty źbili samalot. Na hetaj padstavie pazoŭniki patrabujuć ad Hirkina kampensacyi ŭ pamiery 900 miljenaŭ dalaraŭ.
«Boinh-777» avijakampanii Malaysia Airlines, jaki vykonvaŭ rejs MH17 z Amsterdamu ŭ Kuała-Łumpur, byŭ źbity 17 lipienia 2014 hoda ŭ niebie nad Danbasam. Jaho abłomki ŭpali niedaloka ad vioski Hrabava na terytoryi separatysckaj «DNR». Zahinuli 298 čałaviek, bolš za dźvieście byli hramadzianami Niderlandaŭ, na borcie byli taksama hramadzianie Małajzii, Aŭstralii i inšych krain.
Raśśledavańnie katastrofy ŭžo čatyry hady viadzie Sumiesnaja śledčaja hrupa, u jakuju ŭvachodziać pradstaŭniki Aŭstralii, Belhii, Małajzii, Niderlandaŭ i Ukrainy.
Zhodna ź jaje vysnovami, samalot byŭ źbity vyrablenaj u Rasiei rakietaj z zenitna-rakietnaha kompleksu «Buk», jaki naležaŭ 53-j zenitna-rakietnaj bryhadzie uzbrojenych sił RF, dyślakavanaj u Kursku. Ustanoŭka była pierakinutaja na terytoryju separatystaŭ, niepadkantrolnuju Kijevu, z terytoryi Rasiei.
Kamientary