Sto rubloŭ za pakusanuju ruku. Abaronca Kurapataŭ prajhrała sud naviedniku restarana «Pajedziem, pajadzim»
Mienski rajonny sud častkova zadavoliŭ pazoŭ mienčuka Aleha Zadarožnaha da aktyvistki Natalli Harački, piša «Radyjo Svaboda».
Pazoŭca patrabavaŭ 2 tysiačy rubloŭ kampensacyi za maralnuju škodu i fizyčnyja pakuty. Sudździa Pavał Chomič zadavoliŭ pazoŭ tolki na 100 rubloŭ. Sam Zadarožny na praces nie pryjšoŭ.
«Zamova jość zamova», — acharaktaryzvała prysud Natalla Haračka. Jana zajaviła, što abskardzić vyrak, padaść sustrečny pazoŭ na Aleha Zadarožnaha i napiša skarhu ŭ prakuraturu, bo ŭ spravie źnik akt jaje medyčnaj ekspertyzy.
«Heta ŭžo padobna da falšavańnia spravy», — adznačyła Haračka.
Incydent zdaryŭsia letaś 5 červienia. U toj viečar restaracyju pikietavali bolš za 10 aktyvistaŭ, a za niekalki chvilinaŭ da źjaŭleńnia Aleha Zadarožnaha aŭtamabil źbiŭ adnaho ź pikietoŭcaŭ — Leanida Kułakova.
Kali Aleh Zadarožny pačaŭ aburacca, što jamu nie dajuć prajechać u restaracyju, pikietoŭcy ŭstupili ź im u sprečku. Dalejšyja padziei, pavodle bakoŭ, adbyvalisia pa-roznamu.
Pavodle Aleha Zadarožnaha, Natalla Haračka ŭkusiła jaho za ruku. Sama ž Natalla Haračka śćviardžaje, što heta Aleh Zadarožny hruba jaje schapiŭ dy jašče i ŭdaryŭ, a jana musiła baranicca.
Płatnaja ekspertyza 25 červienia vyjaviła ŭ Zadarožnaha barvovuju ssadzinu i hiematomu. Haračka miarkuje, što praz 20 dzion śladoŭ u jaho na ruce zastacca ŭžo nie mahło.
Pavodle jaje, sud nie pažadaŭ raźbiracca z hetym arhumentam, a taksama vyklikać Zadarožnaha na praces i prahladać videa ź miesca zdareńnia.
Atrymać kamentar u Aleha Zadarožnaha nie ŭdałosia.
Alehu Zadarožnamu 54 hady. Pra siabie jon paviedamlaŭ, što rodam sa Skidziela, u dziacinstvie zdymaŭsia ŭ kino, na momant kanfliktu pracavaŭ strachavym ahientam.
Kamientary