Łukašenka raskazaŭ pra alternatyŭnyja pastaŭki nafty: hatovy kuplać u ZŠA, Saudaŭskaj Aravii i ŭ Emiratach

Alaksandr Łukašenka raskazaŭ ab vidach na alternatyŭnyja pastaŭki nafty ŭ Biełaruś, akramia zakupak u Rasii. Adpaviednyja zajavy kiraŭnik dziaržavy zrabiŭ siońnia, razmaŭlajučy z pradstaŭnikami pracoŭnaha kalektyvu RUP «Zavod hazietnaj papiery» ŭ Škłovie, piša BiełTA.

«Vy ž bačycie, što kožny hod pierad novym hodam nam davodzicca stajać na kaleniach i vymolvać hetyja naftapradukty», — adznačyŭ biełaruski lidar.

Alaksandr Łukašenka padkreśliŭ, što ŭ razmovie z Uładzimiram Pucinym zusim nie blefavaŭ i abmalavaŭ karcinu, jak Biełaruś budzie dziejničać, kali rasijski bok nie źmienić svaju pazicyju.

Adzin z maršrutaŭ alternatyŭnaj pastaŭki — praz party na Bałtycy, i takim čynam užo zakuplena i pastaŭlajecca partyja narviežskaj nafty. Jašče adzin bałtyjski maršrut — z Hdańska pa adnoj ź nitak naftapravoda «Družba», jaki dla hetaha nieabchodna budzie zapuścić u reviersnym režymie.

«Ja Pucinu prosta skazaŭ: na pieršym etapie, kali my z palakami damovimsia, budziem reviersam pastaŭlać pa adnoj z troch trub», — skazaŭ jon.

Treci kirunak, praciahnuŭ Alaksandr Łukašenka, taksama ŭžo aprabavany. U pryvatnaści, havorka idzie pra pastaŭki praz Ukrainu z Čornaha mora.

«I čaćviortaje — heta Rasija. My nie admaŭlajemsia ad hetaj nafty. Ale takim čynam adbudziecca dyviersifikacyja pastavak. Heta značyć, my nie z adnoj krainy ad manapolii budziem atrymlivać naftu», - zajaviŭ kiraŭnik dziaržavy.

«My pačali testavać hetyja maršruty, chočam pahladzieć, što atrymajecca nasamreč. Jakija ŭ nas buduć straty ŭ paraŭnańni ź ciapierašnim koštam rasijskaj nafty. Heta nie blef, heta nie toje, što, jak jany tam kažuć, Łukašenka staŭki padymaje pierad pieramovami. Nijakich stavak. My prosta hladzim, što my budziem mieć, kolki my budziem pry hetym hublać», - padkreśliŭ biełaruski kiraŭnik.

Jon dadaŭ, što kali ciapier nie vyrašyć hetaje pytańnie, to praz dva hady pryjdziecca naohuł šalonymi tempami heta realizoŭvać.

«Bo tady ŭžo havorki nie budzie navat pra hetyja 18% mytnaj pošliny, jakuju jany jašče ŭ nas nie zabrali, i pra toje, što košt rasijskaj nafty budzie tańniejšy. Tamu chočam my hetaha ci nie, my budziem iści hetym šlacham. Nam nielha zaležać ad adnoj krainy, adnaho pradpryjemstva. Heta manapalizm, i ŭ hetym naša prablema», — upeŭnieny kiraŭnik dziaržavy.

Pavodle jaho słoŭ, Biełaruś damaŭlajecca z usimi ŭdzielnikami suśvietnaha rynku: «amierykancami, Saudaŭskaj Aravijaj, Emiratami. Bliskučyja ŭ mianie ź imi adnosiny. Kažuć, kolki treba, stolki nafty pastavim. Viadoma, heta suśvietnaja cana. Ale jakaść nafty tam lepšaja».

• 0
• 0
• 0
• 0
• 0
• 0
• 0
• 0