Plus 15 tysiač vypadkaŭ za dzień. Kitaj pryznaŭ, što kolkaść chvorych na karanavirus našmat bolšaja, čym raniej paviedamlałasia
U Kitai za apošnija sutki zarehistravali 15408 novych vypadkaŭ karanavirusa.
Pra heta paviedamlajuć kitajskija ŚMI.
Heta rekordnaja kolkaść zaražanych za dzień. Raniej maksimalnaja ličba, kala 3900 čałaviek, była adznačanaja 4 lutaha. Kitajskija ŭłady tłumačać rezki skačok tym, što pierajšli na novy mietad dyjahnastavańnia chvaroby. Raniej dyjahnaz «karanavirus» stavili tolki paśla analizu RNK, ciapier — pa prykmietach pnieŭmanii ŭ lohkich.
Novyja ličby, faktyčna, paćviardžajuć, što realnaja kolkaść zaražanych i chvorych bolšaja, čym aficyjna paviedamlałasia.
Na «novy mietad dyjahnostyki» pakul pierajšli tolki ŭ pravincyi Chubej, centry epidemii.
Kolkaść zaražanych karanavirusam u kitajskaj pravincyi Chubej pieravysiła 48,2 tysiačy, vypisany z balnicy 3441 čałaviek, pamierli 1310, paviedamlajuć mižnarodnyja infarmacyjnyja ahienctvy sa spasyłkaj na rehijanalny kamitet achovy zdaroŭja.
Jak paviedamlajecca, u pravincyi paćvierdžana 14 840 novych vypadkaŭ zachvorvańnia i 242 śmierci. U balnicach znachodziacca jašče bolš za 33 tysiač čałaviek, ź ich 5647 — u ciažkim stanie.
U astatniaj častcy Kitaja chvorych uličvajuć raniejšym mietadam. Za sutki tam dabaviłasia 568 novych vypadkaŭ, što aznačaje: epidemija jašče nie idzie na spad.
Pazityŭnaja navina, što za miežami Kitaja krainam udajecca davoli efiektyŭny strymlivać raspaŭsiud virusa. Va ŭsich astatnich krainach zarehistravana kala 570 vypadkaŭ zachvorvańnia na novy karanavirus. Niebiaśpiečny kłastar pakul tolki adzin — heta akijanski kruizny łajnier, pryšvartavany ŭ japonskim porcie Ijakahama. Jon staić na karancinie, i na im adznačana ŭžo 219 vypadkaŭ pry tym, što ŭsiaho na borcie 3700 čałaviek. Siarod tych, chto zachvareŭ, — adzin z čynoŭnikaŭ, jakija kantralavali ŭviadzieńnie karancinu. Jon nasiŭ abarončuju masku, ale nie dezinfiekavaŭ svajho adzieńnia.
Ułady Kitaja ŭ čaćvier paviedamili pra zvalnieńnie strełačnikaŭ — kiraŭnikoŭ Uchańskaha abłasnoha i haradskoha kamitetaŭ kamunistyčnaj partyi za «niedachopy» ŭ arhanizacyi baraćby z epidemijaj.
Kamientary