Dva tydni tamu, 6 sakavika, u Haradku Viciebskaj vobłaści adbylisia pieršyja prajmieryz pa vyłučeńni adzinaha kandydata ad apazicyjnych sił. Kiraŭniki partyj rapartavali, što paralelna, u tyja samyja daty, budzie zapuščany i sajt dla hałasavańnia. Adnak za hety čas płatforma ŭsio jašče nie zapracavała. Čamu?
Hetaje pytańnie my adrasavali kiraŭniku partyi «Zialonyja» Dźmitryju Kučuku, jaki zajmajecca zapuskam sajta. «U pryncypie, praca zakančvajecca. Nakolki ja razumieju, tam zastajecca 3-5 hadzin pracy. Ale ŭ situacyju ŭmiašaŭsia karanavirus. Sprava ŭ tym, što našyja češskija padradčyki zaraz znachodziacca na karancinie, pracujuć addalena, tamu nie zaŭsiody mohuć apieratyŭna adciahvacca na našy prajmieryz», — zaznačaje Dźmitryj Kučuk.
«Bližejšym časam usio pratestujem i zapuścim. Kali ŭsio budzie dobra, to jość šaniec, što sajt zapracuje ŭžo ŭ bližejšy paniadziełak. Raniej my płanavali skončyć hałasavańnie 30 krasavika, ale ciapier praciahniem na dva tydni — da 15 maja», — skazaŭ palityk.
Pa słovach Kučuka, prablemu taksama stvaryła toje, što pieršpačatkova ŭ prajmieryz płanavali ŭdzieł až 6 palitykaŭ, a ciapier zastałosia tolki troje.
Raniej kandydatam na prajmieryz nie była zarehistravanaja byłaja deputatka parłamienta Hanna Kanapackaja, a praź niejki čas z dystancyi syšli Pavieł Sieviaryniec i Alaksiej Janukievič, jakija vyrašyli źniacca praz raspaŭsiud karanavirusa, a taksama praz masavy ŭdzieł čynoŭnikaŭ u rehijanalnych prajmieryz.
Na siońnia kandydatami zastajucca Juraś Hubarevič (ruch «Za svabodu»), Mikałaj Kazłoŭ (AHP) i Volha Kavalkova (niezaležnaja vyłučenka). Pajezdki pa rehijonach prypynienyja na dva tydni.
Kamientary