Novy premjer — vychadziec sa śpiecsłužbaŭ Raman Hałoŭčanka
Siońnia Łukašenka pryznačyŭ novy ŭrad. Novym premjeram pryznačany kiraŭnik Dziaržaŭnaha vajskova-pramysłovaha kamiteta Raman Hałoŭčanka.
Napiaredadni, 3 červienia, Siarhiej Rumas byŭ adpraŭleny ŭ adstaŭku. Jon adpracavaŭ na pasadzie premjera z 18 žniŭnia 2018 hoda.
Raman Hałoŭčanka naradziŭsia ŭ 1973 hodzie. U 1996-m skončyŭ MHIMO — Maskoŭski dziaržaŭny instytut mižnarodnych adnosin, kuźniu kadraŭ śpiecsłužbaŭ i dypłamatyi spačatku SSSR, a paśla - Rasii. Paźniej u Biełarusi jon dadatkova «pavysiŭ kvalifikacyju ŭ Akademii kiravańnia pry prezidencie (2003).
Na svaim słužbovym šlachu jon napačatku pieramiaščaŭsia pa ŭstanovach śledam za ŭpłyvovym siłavikom Viktaram Šejmanam.
Adpaviedna, pracavaŭ u Radzie biaśpieki ŭ toj pieryjad, kali źnikali dziejačy apazicyi i adbyvalisia masavyja represii suprać praciŭnikaŭ Alaksandra Łukašenki (1997—2002, 2006—2009). Pracavaŭ taksama ŭ hienieralnaj prakuratury (2002—2005), Administracyi prezidenta (2005—2006).
U 2009—2013 — pieršy namieśnik staršyni Dziaržaŭnaha vajenna-pramysłovaha kamiteta.
U 2013—2018 — pasoł u AAE.
U 2018—2020 — staršynia Dziaržaŭnaha vajskova-pramysłovaha kamiteta. (Zaraz hetu pasadu zojmie Dźmitryj Pantus.)
Pieršym vice-premjeram pryznačany Mikałaj Snapkoŭ, jaki tolki niadaŭna byŭ pryznačany pasłom u Kitaj, a da taho doŭha kiravaŭ ekanomikaj z Administracyi prezidenta i va ŭradzie. Snapkoŭ maje reputacyju łajalnaha vykanaŭcy rasparadžeńniaŭ źvierchu.
Dźmitryj Kruty, jaki byŭ pieršym vice-premjeram, pryznačany, u svaju čarhu, namieśnikam kiraŭnika Administracyi prezidenta.
Vice-premjeram staŭ Ivan Subocin.
Kiraŭnikom Dziaržkantrolu pryznačany namieśnik staršyni KDB Ivan Cierciel (raniej pasadu zajmaŭ vieteran biurakratyčnaha aparata Leanid Anfimaŭ).
Ministram infarmacyi staŭ kiraŭnik STB Ihar Łucki — jon raniej byŭ namieśnikam ministra ŭ hetym viedamstvie.
Ministram finansaŭ staŭ pieršy namieśnik ministra Juryj Sielivierstaŭ. Rynačnik-ministr Jermałovič piarojdzie na dypłamatyčnuju pracu.
Ministram ŽKH staŭ Andrej Chmiel (byŭ Alaksandr Cierachaŭ).
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary