Milicejski hruzavik pajechaŭ na natoŭp na praśpiekcie Mašerava. Što tam adbyłosia? FOTA
Adnym z dramatyčnych momantaŭ viečara 9 žniŭnia stała zdareńnie na praśpiekcie Mašerava ŭ Minsku, dzie milicejski hruzavik pajechaŭ prosta na natoŭp ludziej. Karespandenty «Našaj Nivy» stali vidavočcami incydentu.
Łancuh amapaŭcaŭ sa ščytami stajaŭ kala skryžavańnia praśpiektaŭ Mašerava i Pieramožcaŭ, nie puskajučy demanstrantaŭ da Steły. Za imi znachodzilisia dziasiatki aŭtazakaŭ i inšaj śpiectechniki. Tysiačy demanstrantaŭ u svaju čarhu pierakryli praśpiekt Mašerava i znachodzilisia na prajeznaj častcy. Praz natoŭp pieryjadyčna sprabavali prajechać mašyny chutkaj dapamohi, i ludzi imhnienna rasstupalisia.
Adnak kali na natoŭp pajechaŭ sa śpiny, z boku vulicy Kalvaryjskaj, milicejski hruzavik, ludzi nie razyšlisia. A kiroŭca vyrašyŭ jechać prosta na ich. Niekalki čałaviek uskočyli na prystupki kabiny, jašče adzin apynuŭsia pierad łabavym škłom. Kiroŭca hruzavika na imhnieńnie prytarmaziŭ, a paśla znoŭ staŭ nabirać chutkaść. Bolšaść ludziej adskočyła (ci navat saskočyła z kabiny), ale toj adzin pierad łabavym škłom saskočyć nie moh.
Hruzavik, prarvaŭšysia praz natoŭp, pajechaŭ na chutkaści da «svaich», da łancuha z AMAPam. Chłopiec pierad łabavym škłom niekalki siekund dumaŭ, jak jamu saskočyć, kab nie być zatrymanym, i ŭrešcie pasprabavaŭ adšturchnucca. Adlacieŭ jon nienamnoha, litaralna na paŭmietra. U vyniku jon ledź nie trapiŭ pad koły hruzavika. Kiroŭca ŭ apošniaje imhnieńnie staŭ tarmazić, ale, zdajecca, usio ž pierajechaŭ nahu čałavieka. Prynamsi paśla taho jak hruzavik prarvaŭsia da amapaŭcaŭ, demanstrant zastaŭsia lažać na asfalcie. Ustać sam jon nie moh, da jaho padskočyli ludzi, na jakich jon zmoh abapiercisia, i, kulhajučy, adyści ŭ bok.
Praź niekalki chvilin, kali amapaŭcy pačali ŭ čarhovy raz zakidvać demanstrantaŭ šumavymi hranatami, i źjavilisia paranienyja, chutkaja dapamoha zabrała čałavieka z paškodžanaj nahoj. Niezrazumieła, ci heta byŭ toj samy demanstrant z hruzavika, ci inšy paciarpieły.
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska1
Kamientary