Płatforma «Hołas» patłumačyła, čamu dvuchmoŭje, a nie biełaruskaja mova staić u kanstytucyjnym apytańni pa zmoŭčańni
Płatforma «Hołas» zaklikaje da 18 kastryčnika ŭziać udzieł u apytańni nakont staŭleńnia da papravak u Kanstytucyju.
Takim čynam stvaralniki płatformy miarkujuć, što biełaruskaja hramadzianskaja supolnaść vykaža svajo staŭleńnie da kanstytucyjnaj reformy, jakaja była inicyjavanaja ŭładami.
Usiaho naviedvalnikam «Hołasu» prapanujecca adkazać na šeść pytańniaŭ, siarod jakich raźmierkavańnie miž halinami ŭłady, abmiežavańnie terminaŭ paŭnamoctvaŭ prezidenta, udzieł Biełarusi ŭ intehracyjnych abjadnańniach, dziaržaŭnyja movy, paradak praviadzieńnia refierendumaŭ i kolkaść pałat parłamienta.
Prahramist Michaś Bajaryn źviarnuŭ uvahu na takuju detalku: «Hołas» pačaŭ apytańnie pa Kanstytucyi, ja navat prajšoŭ. Ale asadačak zastaŭsia. Jość pytańnie pra movu. I tam jość
varyjant pa zmoŭčańni — biełaruskaja i rasiejskaja. U adroźnieńnie ad usich inšych pytańniaŭ, dzie varyjanty pa zmoŭčańni adnaŭlajuć Kanstytucyju 1994-a hoda, — hety varyjant zamacoŭvaje vyniki refierendumu, jakim dušyli i hvałcili našuju movu usie hetyja hady».
«Naša Niva» źviarnułasia pa kamientar da Paŭła Libiera, adnaho sa stvaralnikaŭ płatformy «Hołas», kab jon patłumačyŭ, čamu tak stałasia:
«Nasamreč, u hetym niama nijakaj sistemy abo namieru. Prosta vielmi chutka rabili, kab byŭ u kožnaj siekcyi pieršy adkaz vydzieleny, inakš nie ŭsie razumieli, što ŭnutry siekcyi jość vybar miž adkazami.
Bolš za toje, my dumajem, ci pakidać varyjanty pa zmoŭčańni, bo z adnaho boku jany dajuć zrazumieć, što vybar možna pamianiać, ale z druhoha boku — biantežać niekatorych karystalnikaŭ», — skazaŭ Libier.
Ahułam u apytancy ŭziali ŭžo ŭdzieł 235 tysiač čałaviek. Heta našmat bolš, čym u lubym «hramadskim abmierkavańni» ŭ Biełarusi raniej. Pramiežkavymi vynikami arhanizatary vyrašyli nie dzialicca.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1414
Kamientary