U kamandzie Łatuški zamiena — novy adkazny za sport. Daviedalisia, čamu syšła Hierasimienia
Vadzim Kryvašejeŭ staŭ adkaznym za moładzievuju palityku i sport u Nacyjanalnym antykryzisnym upraŭleńni (NAU). Raniej hetaja pasada była za pryziorkaj alimpijskich hulniaŭ u płavańni Alaksandraj Hierasimieniaj. Što staić za źmienaj?
Vadzimu Kryvašejevu 38 hadoŭ. Kaliści zajmaŭsia viełasportam. Byŭ dyrektaram Respublikanskaha centra alimpijskaj padrychtoŭki pa viełasporcie, a ŭ 2016 — zaniaŭ anałahičnuju pasadu ŭ frystajle.
Kali paśla vybaraŭ mnohija frystajlisty, u tym liku słavuty trenier Mikałaj Kazieka, padpisali pad listom za novyja vybary i adstaŭku Łukašenki, to da frystajlistaŭ pryjechaŭ namieśnik ministra sportu i turyzmu Viačasłaŭ Durnoŭ, jaki pračytaŭ lekcyju, ale nie ŭbačyŭ nijakaha vodhuku ŭ vačach prysutnych. Paśla hetaha Kryvašejevu było prapanavana zvolnicca — praz pravalenuju ideałahičnuju rabotu.
Paśla hetaha ministr sportu Siarhiej Kavalčuk prapanoŭvaŭ Kryvašejevu pierajści ŭ RCAP pa vodnych łyžach, ale funkcyjanier admoviŭsia. U pačatku vieraśnia Kryvašejeva zvolnili z pracy. Admietna, čynoŭnik pryznavaŭsia, što hałasavaŭ na vybarach za Łukašenku, ale potym kardynalna źmianiŭ pohlady paśla hvałtu pieršych dzion paśla vybaraŭ. Toje samaje kazaŭ i Mikałaj Kazieka.
U pres-słužbie NAU tak patłumačyli źmienu: «Hierasimienia skancentravałasia na pracy ŭ Fondzie spartyŭnaj salidarnaści, pracy ŭ jaje šmat. Vadzim Kryvašejeŭ pryjšoŭ u kamandu NAU, kab zajmacca spartovym kirunkam i słužyć mastkom pamiž nami i fondam dla sumiesnych prajektaŭ».
Viadoma, što Hierasimienia sama dapamahła znajści sabie źmienu ŭ asobie Kryvašejeva.
Jak stała viadoma «Našaj Nivie» ź niekalkich krynic, asnoŭnaj pryčynaj sychodu Hierasimieni z NAU stała chutkaje papaŭnieńnie ŭ siamji. U suviazi z hetym Alaksandra krychu źmianšaje aktyŭnaść.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ9
Kamientary