Da 6 hadoŭ: sudziać mužčyn, jakija na Puškinskaj adbili demanstranta ad amapaŭcaŭ i prymusili siłavikoŭ uciačy
U sudzie Frunzienskaha rajona razhladajuć spravu čaćviarych mužčyn, jakija ŭdzielničali ŭ «Maršy Honaru» 11 kastryčnika. Heta Jaŭhien Baroŭski, Ivan Ziańko, Alaksiej Drab i Uładzimir Kackiel. Usie jany pad vartaj.
Mužčyn vinavaciać u tym, što jany adbivali pratestoŭca ad milicyi padčas Maršu 11 kastryčnika. Ich abvinavačvajuć adrazu pa troch artykułach — naŭmysnaje źniščeńnie majomaści, parušeńnie hramadskaha paradku i hvałt u dačynieńni da milicyi.
Pryčym, miarkujučy pa tym, što čałaviek, jakoha adbivali, paznačany jak «niavyznačanaja asoba», jakraz-taki zmahli adbić.
Pavodle materyjałaŭ śledstva, usie čaćviora abvinavačanych atakavali «Falksvahien Transparcior», pryparkavany kala «Puškinskaj». Heta bus, kudy siłaviki zaciahvali demanstrantaŭ. Baroŭski prymaŭ bajavyja stojki, zastrašvajučy amapaŭcaŭ.
Ziańko schapiŭ niejkuju skryniu, kinuŭ u bok adnaho z amapaŭcaŭ, ale toj paryravaŭ udar. Tady Ziańko raźbiŭ zadniaje škło «Falksvahiena».
Drab schapiŭ amapaŭca za rukaŭ i za šyju, a kali toj vyrvaŭsia, adzin raz udaryŭ kułakom.
Narešcie, Kackiel nanios amapaŭcu nie mienš za try ŭdary rukoj u vobłaść hałavy (uličvajučy, što ŭsie amapaŭcy ŭ šlemach). Paśla hetaha schapiŭ inšaha amapaŭca za abmundziravańnie i dvojčy ŭdaryŭ.
Paśla hetaha amapaŭcy ŭciakli ź miesca sutyčki. Demanstrantaŭ zatrymlivali ŭ nastupnyja dni. Bojka trapiła na kamiery videanazirańnia, zdymali jaje i vidavočcy.
Śviedka Alaksandr Kazuch raspavioŭ, što bačyŭ zatrymańnie Baroŭskaha. Taho zatrymali praz paru dzion paśla Maršu — 15 kastryčnika.
«My vyjšli z kramy, jaho pačali krucić i zakinuli ŭ bus, — zhadaŭ Kazuch. — Tyja, chto zatrymlivaŭ, ničoha nie tłumačyli i nie pradstaŭlalisia».
Jaŭhien Baroŭski, Jaŭhien Kackiel i Ivan Ziańko vinu nie pryznajuć ŭ poŭnym abjomie, Alaksiej Drab pryznaje častkova. Abvinavačanym pahražaje da 6 hadoŭ.
Videa taho kanfliktu 11 kastryčnika
Paciarpiełymi pa spravie pryznanyja siamiora amapaŭcaŭ. Heta kamandzir adździaleńnia 4-j roty Dźmitryj Dabrynia, kamandzir 4-j apieratyŭnaj hrupy Alaksandr Čorny, praparščyk Maćviej Biazrukaŭ, kiroŭca Jaŭhien Bieły — usie jany chočuć pa 3000 rubloŭ kampiensacyi. A taksama praparščyk Ivan Palikarpaŭ, staršy siaržant Alaksiej Marhunoŭ i siaržant Paŭłovič.
Taksama minskaja milicyja prosić kala 4000 rubloŭ, a «Minsktrans» u Baroŭskaha — 4700 rubloŭ.
Vyrašaje los abvinavačanych sudździa Julija Bliźniuk.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2121
Kamientary