Kanflikt pamiž Biełaruśsiu i Rasiejaj nabyŭ novaje, vajskova-palityčnaje vymiareńnie. Piša ŭ svaim błohu na sajcie Radyjo Svaboda Jury Drakachrust.
Kanflikt pamiž Biełaruśsiu i Rasiejaj nabyŭ novaje, vajskova-palityčnaje vymiareńnie. Jon pačaŭsia z rezkich charaktarystyk biełaruskaj ekanomiki rasiejskim ministram finansaŭ Alaksiejem Kudrynym i z prytrymańnia Rasiejaj čarhovaj tranšy abiacanaha kredytu, potym pieraros u małočnuju vajnu. I zaraz – čarhovy vitok.
Alaksandar Łukašenka admoviŭsia jechać na samit Damovy ab kalektyŭnaj biaśpiecy SND i pry hetym Biełaruś admoviłasia padpisać pahadnieńnie ab stvareńni supolnych siłaŭ chutkaha reahavańni ŭ miežach hetaj vajskovaj arhanizacyi.
Ciapierašni małočny kanflikt – nia pieršy i mahčyma nia samy žorstki ŭ dvuchbakovych adnosinach, ale ŭpieršyniu Miensk naŭprost źviazvaje ekanamičnaje supracoŭnictva z vajskovym, zakranaje tuju sferu, jakaja zastavałasia niedatykalnaj u razhar hazavaj vajny 2004 hodu i naftavaj –2007-ha. Da taho ž Łukašenka addaŭ zahad faktyčna adnavić mytnuju miažu z Rasiejaj ci prynamsi niekatoryja jaje elementy. I hetaha nie było ŭ raniejšych kanfliktach. Čamu ciapier kanflikt achapiŭ faktyčna ŭsie sfery dvuchbakovaha supracoŭnictva, čamu Łukašenka, fihuralna kažučy, pačaŭ rezać «śviatarnych karovaŭ»?
Na pieršy pohlad pryčyna – krytyčnaść sytuacyi, pavodle acenak ekspertaŭ zamianić rasiejski małočny rynak, pa mienšaj miery ŭ chutkim časie, dla Biełarusi naŭrad ci mahčyma. Ale hazavy ci naftavy kryzysy byli nia mienš, kali nia bolš krytyčnymi – rasiejski haz taksama niama čym zamianić, a bieź jaho ŭstała b nia tolki małočnaja, a ŭsia biełaruskaja vytvorčaść.
Ja miarkuju, što zaraz Miensk pačaŭ hulać usimi kazyrami tamu, što ŭ jaho zamiežnaj palityki źjaviłasia zachodniaje vymiareńnie, źjaviłasia hieapalityčnaja alternatyva.
Pryčym, apošniaje rašeńnie MVF ab novym kredycie dla Biełarusi śviedčyć pra toje, što partnerstva Biełarusi z EZ – nia tolki symbali i žesty. Narmalizacyja adnosinaŭ Miensku z Eŭropaj – heta i pryčyna kanfliktu z Rasiejaj i tłumačeńnie pavodzinaŭ u kanflikcie. Kali zaraz Miensk nia vytryvaje, nie prymusić Maskvu źmirycca z novaj hieapalityčnaj realnaściu, jakaja skłałasia paśla dałučeńnia Biełarusi da partnerstva, jon prajhraje ŭsio. Tamu i vykidajucca staršyja kozyry, tamu i režuć, ci pahražajuć zarezać «śviatarnych karovaŭ»?
Nakolki ž balučymi dla Rasiei źjaŭlajucca hetyja kroki aficyjnaha Miensku? Hetyja kroki dla Maskvy davoli niepryjemnyja.
Pavodle statusu ADKB pryncypovyja, niepracedurnyja rašeńni prymajucca ŭ hetym vajskovym sajuzie kansensusam. Praŭda, na Ŭschodzie hałoŭnaje nia tekst, a kantekst – ministar zamiežnych spravaŭ Rasiei Siarhiej Łaŭroŭ zajaviŭ, što siły chutkaha reahavańnia možna stvaryć i biaz zhody Biełarusi. I sapraŭdy, 14 červienia pahadnieńnie było padpisanaje inšymi ŭdzielnikami damovy bieź Biełarusi.
Ale lehitymnaść takoha rašeńnia budzie nižejšaj. Inšyja siabry damovy nie harać žadańniem pasyłać svaich sałdataŭ vajavać u vypadku čaho na terytoryi sajuźnikaŭ. I jany mohuć skarystać kateharyčnuju niazhodu Miensku, kab nia ŭdzielničać u pahadnieńni, navat kali jaho padpisali.
Da taho ž, ciapierašni krok možna razhladać jak namiok na mahčymaść dalejšych krokaŭ u tym samym nakirunku – rasiejskija bazy ŭ Vilejcy i Hancavičach, damova ab supolnaj supraćpavietranaj abaronie mohuć stać čarhovymi achviarami ciapierašniaha kanfliktu. Miensk abaznačyŭ, što hatovy iści kali nie da kanca, to vielmi daloka. Moža i nia pojdzie. Heta blef, vajna nervaŭ. A moža i nia blef. Pytańnie, ci hatovaja da takoj hulni Maskva...
Kamientary