Siejm Łatvii ŭ čaćvier zaćvierdziŭ papraŭki da zakonaŭ ab schodach, šeściach i pikietach i ab biaśpiecy publičnych zabaŭlalnych i śviatočnych mierapryjemstvaŭ, jakija zabaraniajuć vykarystańnie hieorhijeŭskich stužak na publičnych zabaŭlalnych i śviatočnych mierapryjemstvach, schodach, šeściach i pikietach, paviedamlaje Delfi.
Raniej staršynia kamisii pa pravach čałavieka Artus Kajmińš zajaviŭ, što, prymajučy pad uvahu ekspansiju Rasii va Ukrainie i tatalitarnuju ideałohiju Rasii ŭ dačynieńni da respublik byłoha SSSR, u Łatvii jość padstavy bačyć dastatkovuju pahrozu svajmu demakratyčnamu ładu i biaśpiecy. «Zabarona hieorhijeŭskaj stužki abmiažuje takija ideałahičnyja prajavy. My pavinny prademanstravać, što my suprać vykarystańnia hetych stužak na publičnych mierapryjemstvach», — skazaŭ Kajmińš, dadaŭšy, što nie prymaje kaštoŭnaści, jakija simvalizuje hetaja stužka, hetak ža, jak kaštoŭnaści pirackaha ściaha.
Ciapier zakon ab biaśpiecy hramadskich zabaŭlalnych i śviatočnych mierapryjemstvaŭ i zakon ab schodach, šeściach i pikietach zabaraniaje vykarystańnie, u tym liku ŭ stylizavanaj formie, ściahoŭ, hierbaŭ i himnaŭ byłoha SSSR, jaho respublik i nacysckaj Hiermanii, nacysckich svastyk, znakaŭ SS i savieckich simvałaŭ — siarpa i mołata ź piacikancovaj zorkaj, za vyklučeńniem vypadkaŭ, kali meta ich vykarystańnia nie źviazanaja z prasłaŭleńniem tatalitarnych režymaŭ abo apraŭdańniem učynienych złačynstvaŭ.
Kamientary