Biełaruskaje dobraachvotnaje tavarystva achovy pomnikaŭ historyi i kultury prypyniaje dziejnaść svajoj memaryjalnaj sekcyi. Pra heta BiełaPAN paviedamiŭ staršynia tavarystva Anton Astapovič.
Pavodle jaho słoŭ, šmatlikija aktyvisty memaryjalnaj sekcyi stali addavać pryjarytet aktyŭnaj palityčnaj dziejnaści, što nie mahło nie paŭpłyvać na jaje pracu. «U toj čas, kali tavarystva nie źjaŭlajecca palityčnaj arhanizacyjaj i maje akreślenyja statutam mety i zadačy, sekcyja stała palityzavacca, nakiroŭvać svaju dziejnaść u nie praduhledžanaje statutam rečyšča, šmatlikija kroki siabroŭ sekcyi navat nie ŭzhadnialisia z kiraŭničymi orhanami arhanizacyi», — skazaŭ Astapovič.
«Najpierš, u našym statucie zapisana, što tavarystva supracoŭničaje z zarehistravanymi hramadzkimi arhanizacyjami i partyjami.
Uvachodžańnie siabroŭ sekcyi ad jaje imia, pra što było zadekłaravana ŭ ŚMI, u tak zvany antykamunistyčny front, jaki stvarajecca pad ehidaj niezarehistravanaj partyi «Biełaruskaja chryścijanskaja demakratyja«, źjaŭlajecca nie tolki hrubiejšym parušeńniem našaha statuta, ale ž krokam pa‑za miežami elementarnaj etyki.Hety krok byŭ zrobleny biaź viedama kiraŭnictva abjadnańnia, jakoje pra hetuju padzieju daviedałasia ź infarmacyjnych blokaŭ navin», — paviedamiŭ Astapovič.
Jon adznačyŭ, što pazastatutnaja dziejnaść sekcyi pryviała da piśmovaha papiaredžańnia z boku Ministerstva kultury Biełarusi ŭ krasaviku 2009 hoda.
«Tamu rasparadžeńniem, jakoje ja pryniaŭ, praca memaryjalnaj sekcyi tavarystva prypyniena da razhladu pytańnia na čarhovym prezydyjumie ŭ vieraśni 2009 hoda», — adznačyŭ Astapovič.
Kiraŭnik memaryjalnaj sekcyi Biełaruskaha dobraachvotnaha tavarystva achovy pomnikaŭ historyi i kultury Viačasłaŭ Siŭčyk skazaŭ, što z hetaj nahody jon nie budzie davać kamentaryjaŭ, bo rasparadžeńnie Astapoviča jon ličyć «unutranaj pierapiskaj arhanizacyi».
Kamientary