Ad 3,5 da 6,5 hoda kałonii — vyniesienyja prysudy čatyrom palitviaźniam pa spravie ŭzłomu kampjutarnaj sistemy Minharvykankama

Sud pa šaści artykułach Kryminalnaha kodeksa — č. 1 art. 350 (madyfikacyja kampjutarnaj infarmacyi), art. 352 (niepravamiernaje zavałodańnie kampjutarnaj infarmacyjaj), č. 1 art. 354 (vykarystańnie škodnasnych kampjutarnych prahram), č. 1 art. 342 (aktyŭny ŭdzieł u hrupavych dziejańniach, jakija hruba parušajuć hramadski paradak), art. 341 (psavańnie majomaści ŭ hramadskich miescach), č. 1 art. 13, č. 2 art. 293 (padrychtoŭka da ŭdziełu ŭ masavych biesparadkach) — ciahnuŭsia dva miesiacy ŭ zakrytym režymie. Za kratami palitviaźni ŭtrymlivajucca ŭžo amal 18 miesiacaŭ. Sudździa Žanna Chvojnickaja pastanaviła razhladać spravu ŭ zakrytym režymie pa pryčynie taho, što «ŭ materyjałach kryminalnaj spravy ŭtrymlivajucca źviestki, jakija składajuć dziaržaŭnuju tajamnicu», paviedamlajuć pravaabaroncy.

32‑hadovaha zasnavalnika i siabra Rady hramadskaha ruchu «Dzieja» Kima Samusienku zatrymali 3 listapada 2020 hoda pa padazreńni va ŭzłomie kampjutarnaj sistemy Minharvykankama (č. 2 art. 349 KK) i dziejańniach, jakija hruba parušajuć hramadski paradak, u Minsku z 9 žniŭnia (č. 1 art. 342 KK). Paśla žorstkaha pieratrusu, jaki supravadžaŭsia strełami ŭ domie i prymianieńniem fizičnaj siły, siłaviki zabrali ŭsiu techniku Kima i jaho žonki, zarehistravanuju palaŭničuju zbroju, hrošy, BČB-ściah, ściah Ukrainy, ukrainski pašpart žonki i inšaje. Praz dva dni byŭ zatrymany i brat Kima — 33-hadovy Alaksiej Samusienka. Jon ekanamist, pracavaŭ u sietcy firmaŭ, jakija zajmajucca vyrabami z płastyku.

Taksama pa hetaj spravie asudžanyja 35-hadovyja Pavieł Drozd i Ivan Andrušojć. Ivan bolš čym praz čatyry miesiacy źniavoleńnia ažaniŭsia ŭ SIZA sa svajoj dziaŭčynaj Sofjaj. 

Pavodle viersii abvinavačvańnia, «u načny čas u kastryčniku i listapadzie 2020 hoda 35‑hadovy mužčyna, znachodziačysia na techničnym paviersie budynka na vulicy Prytyckaha ŭ Minsku, z dapamohaj kampjutarnaj techniki šlacham parušeńnia sistemy abarony i vykarystańnia škodnasnaha prahramnaha zabieśpiačeńnia ažyćciaviŭ niesankcyjanavany dostup da infarmacyi, jakaja zachoŭvajecca ŭ kampjutarnaj sietcy Minskaha haradskoha vykankama. U vyniku nazvanych dziejańniaŭ fihurant zavałodaŭ zapisami kamier videanazirańnia, ustanoŭlenych u stalicy, z metaj nastupnaj publikacyi na roznych internet-resursach, u tym liku destruktyŭnych i ekstremisckich Telegram-kanałach.

Zhodna z materyjałami kryminalnaj spravy, abvinavačanyja z dapamohaj škodnasnaha PZ atrymali dostup da kampjutarnych sistem KUP «CIT Minharvykankama» i HUUS Minharvykankama, što paciahnuła za saboj parušeńnie narmalnaj pracy pradpryjemstvaŭ i dziaržorhanaŭ.

U chodzie rasśledavańnia kryminalnaj spravy dakładna ŭstanoŭlena, što ŭsie mužčyny sistematyčna prymali ŭdzieł u niesankcyjanavanych masavych mierapryjemstvach, jakija adbyvalisia ŭ Minsku sa žniŭnia pa listapad 2020 hoda, spałučanych z błakavańniem daroh i niepadparadkavańniem zakonnym patrabavańniam pradstaŭnikoŭ ułady. Śledstvam zafiksavana 10 faktaŭ ich udziełu».

Padčas praviadzieńnia pieratrusaŭ kanfiskavanyja rečavyja dokazy, u tym liku zarehistravanaja ahniastrelnaja zbroja «Tyhr», «Sajha-MK», «IŽ-54», patrony, broniekamizelka, kaski, miačy, radyjostancyi z harnituraj dla schavanaha našeńnia, ulotki z zaklikami da strajku i piratechnika.

Dziejańni palitviaźniaŭ kvalifikavali pa šaści artykułach Kryminalnaha kodeksa Respubliki Biełaruś: 

• č. 1 art. 342 (aktyŭny ŭdzieł u hrupavych dziejańniach, jakija hruba parušajuć hramadski paradak);
• art. 341 (psavańnie majomaści ŭ hramadskich miescach);
• art. 13, č. 2 art. 293 (padrychtoŭka da ŭdziełu ŭ masavych biesparadkach);
• art. 350 (madyfikacyja kampjutarnaj infarmacyi);
• art. 352 (niepravamiernaje zavałodańnie kampjutarnaj infarmacyjaj);
• art. 354 (vykarystańnie škodnasnych kampjutarnych prahram).

Pieršapačatkova suprać ich raspačali kryminalnuju spravu pa č. 2 art. 349 Kryminalnaha kodeksa Biełarusi (niesankcyjanavany dostup da kampjutarnaj infarmacyi, učynieny hrupaj asob pa papiaredniaj zmovie ź inšaj asabistaj zacikaŭlenaści), adnak jaje spynili.

Sud prachodziŭ u zakrytym režymie, pryčyna — «u materyjałach kryminalnaj spravy ŭtrymlivajucca źviestki, jakija składajuć dziaržaŭnuju tajamnicu».

• 0
• 0
• 0
• 0
• 0
• 0
• 0
• 0