Hetyja ličby śviedčać pra toje, jak vyraśli mahčymaści Ukrainy, jakaja ŭ pačatku vajny nie mahła paraŭnacca z Rasijaj pa intensiŭnaści ŭdaraŭ pa tyłach sapiernika.
Rasijskaje Minabarony paviedamiła, što za sutki siły SPA źbili 992 ukrainskija bieśpiłotniki samalotnaha typu, čatyry kryłatyja rakiety vialikaj dalnaści i dziesiać kiravanych avijabombaŭ. Hety ŭdar nie tolki pabiŭ papiaredni ŭkrainski rekord pa kolkaści vykarystanych za sutki dronaŭ, ale i pieravysiŭ maksimalnuju kolkaść BPŁA, jakuju za sutki vypuskała Rasija, piša «Ahientstvo».
Rasijskaje Minabarony paviedamlaje tolki pra źbityja bieśpiłotniki, što dazvalaje vykazać zdahadku, što nasamreč dronaŭ było bolš.
Papiaredni rekordny ŭdar Ukrainy byŭ zafiksavany 6 červienia. Tady rasijskaje Minabarony paviedamlała pra paražeńnie 911 dronaŭ, 13 avijabombaŭ i čatyroch snaradaŭ HIMARS.
Najbujniejšy za vajnu rasijski ŭdar pa Ukrainie adbyŭsia 24 sakavika. Tady za sutki sumarna Rasija atakavała Ukrainu 948 dronami.
Što heta značyć?
Hetyja ličby demanstrujuć rost mahčymaściaŭ Ukrainy. Pieršyja hady vajny USU nie mahli paraŭnacca z rasijskaj armijaj pa intensiŭnaści ŭdaraŭ uhłyb terytoryi.
Pierałom adbyŭsia sioleta. U sakaviku kolkaść vykarystanych Ukrainaj dronaŭ pa vynikach miesiaca pieravysiła kolkaść BPŁA, zapuščanych Rasijaj.
Tady, pavodle źviestak ukrainskaha manitorynhavaha kanała «Oko Hora», Rasija zapuściła 6462 BPŁA pa Ukrainie. USU ž u sakaviku, pavodle źviestak rasijskaha Minabarony, atakavali Rasiju 7551 BPŁA.
U krasaviku Rasija zapuściła bolš dronaŭ, čym Ukraina (6583 i 4801 adpaviedna). Adnak u mai ŭkrainskija vajennyja znoŭ pieravysili kolkaść dronaŭ, zapuščanych Rasijaj (8973 i 8150 adpaviedna).
Uładzimir Zialenski nazvaŭ masiravany ŭdar pa Maskvie 18 červienia «spraviadlivym adkazam» na rasijskija ataki.
Pavodle jaho słoŭ, Ukraina nie budzie «cichieńka siadzieć», kali Rasija praciahnie vajnu: «Kali budzie hareć Ukraina, budzie hareć i vaša Maskva».
Za niekalki hadzin da hetaha adbyłasia najbujniejšaja z pačatku vajny ataka dronaŭ na Maskvu. Ukrainskija bieśpiłotniki i ich abłomki paškodzili abjekty jak minimum u 10 miescach staličnaha rehijona, pra što śviedčać zajavy ŭład i apublikavanyja ŭ sacsietkach videa.
Udary dronaŭ pa Maskoŭskim NPZ u Kapotni, jaki staŭ hałoŭnaj metaj nalotu, pryviali da pažaraŭ pa mienšaj miery ŭ šaści miescach na terytoryi pradpryjemstva, u tym liku na asnoŭnaj ustanoŭcy pierapracoŭki nafty, śviedčyć analiz «Ahienctva».
Uładzimir Pucin z ranicy vystupaje na samicie ASIEAN u Kazani, ale tak i nie prakamientavaŭ ukrainskija ŭdary.
Kamientary
Dziakuj ZSU, HUR, SBU! Dziakuj Ukraina🇺🇦