Iranskaha doktara departavali ź Biełarusi na 30 hadoŭ

Zatrymańnie za repost i 9 hadzin u KDB

Padstavaj dla pieraśledu stała pierasyłka ŭ asabistych paviedamleńniach u Instagram dopisu ź biełaruskaha pratesnaha pablika, pryznanaha biełaruskimi ŭładami «ekstremisckim materyjałam».

Mužčynu zatrymali ranicaj i dastavili ŭ budynak KDB, dzie ŭtrymlivali na praciahu dzieviaci hadzin. Sa słoŭ mužčyny, siłaviki adkryta pahražali jamu, karystajučysia jahonym uraźlivym stanoviščam:

«Mnie kazali, što kali ja nie budu rabić toje, što jany chočuć, to jany buduć rabić, što chočuć, bo nichto nie viedaje, dzie ja znachodžusia».

Ad zatrymanaha zapatrabavali zapisać videa, na jakim jon pavinien byŭ zajavić ab padtrymcy Korpusa vartavych isłamskaj revalucyi (KVIR) i duchoŭnaha lidara Irana.

Supracoŭniki viedamstva paabiacali, što ŭ vypadku zapisu takoha rolika jaho nie stanuć departavać pa «iranskaj spravie», adnak za pravaparušeńnie ŭ Biełarusi jamu ŭsio roŭna pryjdziecca adbyć termin.

U vyniku sud pryznačyŭ irancu 15 sutak administracyjnaha aryštu pa artykule 19.11 KaAP (raspaŭsiud ekstremisckich materyjałaŭ). Pakarańnie jon adbyvaŭ u IČU na Akreścina.

15 sutak biez duša, prahułak i z błochami

Mužčyna raspavioŭ pra ŭmovy ŭtrymańnia ŭ IČU na Akreścina: «Tam było vielmi brudna i choładna. Byli błochi, jakija kožnuju siekundu mianie kusali. Mnie navat nie dali antyhistamin (lekavy srodak, jakoje zdymaje simptomy alerhii). Uvieś čas kryčali, nazyvali «bandytam». Kali ja siadzieŭ pa palitycy, mianie nie vypuskali navat hulać na śviežaje pavietra. Usie hetyja 15 sutak ja byŭ biez duša i biez srodkaŭ hihijeny. Sa mnoj u kamiery byli jašče dva biełarusy, jakija siadzieli taksama za palityku. U inšych kamierach byli zatrymanyja za narkotyki — u ich umovy byli lepšyja, čym u nas».

Mužčyna padkreślivaje, što źjechaŭ ź Irana i žyŭ u Biełarusi z 2015 hoda mienavita praz składanuju palityčnuju situacyju na radzimie.

Źviarnucca pa dapamohu da dypłamataŭ svajoj krainy jon nie moh, bo ŭ Iranie jamu pahražaje pieraśled až da śmiarotnaha pakarańnia. «Z-za situacyi ŭ Iranie ambasada Isłamskaj respubliki vydała mianie KDB».

Departacyja i zabarona na ŭjezd da 2056 hoda

Paśla adbyćcia 15 sutak aryštu na Akreścina doktara dastavili ŭ Adździeł hramadzianstva i mihracyi. Tam jaho zapeŭnili, što departacyja afarmlajecca terminam na piać hadoŭ, a štamp ab zabaronie na ŭjezd u pašpart stavić nie buduć.

Adnak abiacańni razyšlisia z realnaściu. U aeraporcie mužčynu pratrymali kala 40 chvilin, paśla čaho ŭ jaho dakumienty ŭsio ž pastavili štamp: ujezd u Respubliku Biełaruś jamu zabaronieny na maksimalny termin — na 30 hadoŭ, da 2056 hoda.

Paviedamlajecca, što departacyja ŭ Iran była praduchilena — mužčynu vysłali ŭ treciuju krainu. Jon znachodzicca ŭ biaśpiecy.

• 0
• 0
• 0
• 1
• 1
• 0
• 3
• 0