Staličnaja milicyja: siłavikoŭ pieraaryjentavali na palityku. I majem usplesk bytavych zabojstvaŭ
Siłaviki padvodziać vyniki minułaha hoda. Tak, kiraŭnik minskaj milicyi Michaił Hryb pryznaŭ, što «składany» 2020 hod zapatrabavaŭ pieraraźmierkavańnia resursaŭ. Siłaviki, jakija pavinny byli zajmacca praduchileńniem złačynstvaŭ na hlebie chatniaha hvałtu i ałkahalizmu, zajmalisia pytańniami «niezakonnych masavych mierapryjemstvaŭ». I heta pry tym, što kožnaje druhoje bytavoje złačynstva ździejśnienaje na pjanuju hałavu. Letaś 92 čałavieki byli zabityja svaimi blizkimi.
«Resursy, jakija płanavali nakiravać na prafiłaktyku ałkahalizacyi nasielnictva i chatniaha hvałtu, nakiravali na spynieńnie niezakonnych masavych mierapryjemstvaŭ, kantrol za vykanańniem režymu samaizalacyi, — cytuje Hryba milicejskaja hazieta «Na stražie». — Jak vynik, vypuścili z-pad uvahi častku asob, zdolnych na hlebie złoŭžyvańnia ałkaholem na nieabdumanyja ŭčynki. Na rachunku niećviarozych hramadzian — pałova bytavych złačynstvaŭ».
I heta prablema nie tolki Minska, ale i ŭsioj krainy. Pa statystycy MUS, treci hod zapar raście kolkaść «pjanych» złačynstvaŭ, nie źnižajecca kolkaść bytavych złačynstvaŭ. 92 čałavieki letaś zahinuli ad ruk svaich blizkich.
Pa «pjanaj złačynnaści» naša kraina zajmaje treciaje miesca na postsavieckaj prastory. Najbolš pakazalnymi źjaŭlajucca hvałtoŭnyja złačynstvy: 84% vypadkaŭ naŭmysnaha naniasieńnia ciažkich cialesnych paškodžańniaŭ adbyvajecca na pjanuju hałavu, 75% zhvałtavańniaŭ — taksama ŭ stanie apjanieńnia.
Načalnik minskaj milicyi ličyć, što treba aktyŭniej adpraŭlać zaležnych ad ałkaholu ŭ lačebna-pracoŭnyja prafiłaktoryi (ŁPP). Takaja praktyka časoŭ SSSR zastałasia tolki ŭ našaj krainie.
Pravaabaroncy krytykujuć ŁPP, pakolki kiruje ŭstanovami Departamient vykanańnia pakarańniaŭ MUS, časta ŭmovy tam blizkija da situacyi ŭ kałonijach, sama praktyka vyhladaje jak pakarańnie ludziej za toje, što jany chvoryja (adkaznaść za pravaparušeńni nie zdymajecca źmiaščeńniem u ŁPP).
Ale samaje hałoŭnaje — ułady nie majuć danych ab paśpiachovaści takoha «vypraŭleńnia», u Biełarusi niama ŭliku, kolki ludziej admovilisia ad ałkaholu paśla ŁPP. Pry hetym u niekatorych rajonach isnuje čarha ŭ ŁPP, jany prosta nie zdolnyja źmiaścić usich, kaho tudy nakiroŭvaje sud.
Taksama Hryb dadaje, što čakajucca źmieny ŭ zakanadaŭstvie pa vyjaŭleńni chatniaha hvałtu ŭ siamji. Pašyrycca koła asob, hvałt u dačynieńni da jakich razhladajecca jak chatni (budzie raspaŭsiudžvacca i na byłych žonku ci muža, na sužycielaŭ, jakija viaduć ci viali razam haspadarku).
Taksama źjavicca punkt, što nijakija zvyčai i tradycyi nie mohuć być apraŭdańniem hvałtu. U dačynieńni da parušalnikaŭ buduć raspracavanyja karekcyjnyja prahramy, hvałtaŭnikoŭ mohuć pazbavić prava nabyvać i zachoŭvać zbroju.
Nahadajem, što ŭ vyniku źniščeńnia hramadzianskaj supolnaści spyniła dziejnaść haračaja linija dapamohi achviaram chatniaha hvałtu. Za vosiem hod pa dapamohu źviarnułasia 15 tysiač paciarpiełych. Siońnia ŭ achviaraŭ hvałtu niama takoj mahčymaści.
Raniej u Śledčym kamitecie zajaŭlali, što paśla vybaraŭ u siłavikoŭ źmianilisia pryjarytety. Asnoŭnyja vysiłki byli nakiravanyja na złačynstvy, źviazanyja z masavymi pratestami, u 2021-m dadałasia ŭzmocnienaja baraćba z ekstremizmam i teraryzmam. Tak adbyłosia pieraraźmierkavańnie śpiecyjalistaŭ i premij za vykananuju rabotu.
Čytajcie jašče:
U 2021-m siłaviki zaviali kala 5500 kryminalnych spraŭ za pratesty
U Biełarusi kožnaje piataje złačynstva — na pjanuju hałavu. Heta adzin z samych vysokich pakazalnikaŭ na postsavieckaj prastory
Ciapier čytajuć
«Lutaja, abraźlivaja krytyka ŭsiaho biełaruskaha. Ale ź minułaha ŭ budučyniu niemahčyma prajści mima sučasnaści». Nasievič hruntoŭna adkazaŭ Alesiu Biełamu144144
Kamientary