Ihar Sokał zajaviŭ, što 11 supracoŭnikaŭ biełaruskaha pasolstva pakinuli Ukrainu. Apošni supracoŭnik prajšoŭ nadhlad i pierasiok miažu siońnia a 9-j ranicy.
Biełaruski pasoł Ihar Sokał taksama prakamientavaŭ situacyju, što adbyłasia na pamiežnym pierachodzie Mahiloŭ-Padolski, kali ŭkrainski aficer-pamiežnik sprabavaŭ uručyć jamu 30 siarebranikaŭ dla staršyni Dziaržaŭnaha pamiežnaha kamiteta Biełarusi Anatola Łapo za toje, što ź biełaruskaj terytoryi rasijskija vojski ŭvajšli va Ukrainu.
«Kali kamandujučy pamiežnymi vojskami Ukrainy Dejnieka prymušaje svaich aficeraŭ źbirać hetyja maniety na papierci dla taho, kab kamuści pieradavać, to heta, napeŭna, nie zusim dobraprystojnyja ŭčynki. chaču skazać, što my dosyć doŭhi čas sa svaim kalektyvam na hetym punkcie propusku znachodzilisia na pamiežnaj zonie. Nas było 11 supracoŭnikaŭ», - skazaŭ Ihar Sokał.
Pa jaho słovach, nadhlad doŭžyŭsia ŭsiu noč. «Dastatkova skazać, što maja mašyna jak pasła była całkam nadhledžanaja, raspakavanaja, navat unutranyja elemienty adšyŭki zdymalisia, asabistyja rečy byli ahledžanyja. My zajechali 18 sakavika a 13.30 na punkt propusku. Ja vyjechaŭ u 20.00, a apošni naš supracoŭnik vyjechaŭ siońnia ŭ 9.00», — skazaŭ pasoł.
Nahadajem, što za dzień da napadu Rasii, 23 lutaha, Ukrainu pakinuli ŭsie rasijskija dypłamaty.
Na hety momant na miažu z Ukrainaj ściahnutyja 10 biełaruskich bataljonna-taktyčnych hrup. Kiraŭnik Hienštaba Biełarusi zajaviŭ, što 5 novych BTH pa ratacyi źmianiajuć 5 raniejšych. Raniej biełaruskija ŭłady zajaŭlali, što rasijskija vojski pakinuć terytoryju Biełarusi paśla vučeńniaŭ, adnak zamiest hetaha jany 24 lutaha atakavali Ukrainu. Biełaruskaja armija dahetul nie brała niepasrednaha ŭdziełu ŭ vajnie, abmiažoŭvałasia tyłavoj padtrymkaj rasijskaj armii i pradstaŭleńniem joj terytoryi i aeradromaŭ.
Biełaruskija vojski ciapier skancentravanyja pad Brestam, Kobrynam, Pinskam. Učora vialisia pracy na naviadzieńni pantonnaha mosta cieraz Prypiać kala Lelčyc.
Kamientary