Infarmacyja pra ranieńnie partyzanaŭ nie paćviardžajecca. Rabočy ruch: Napeŭna, heta ŭkid
Pra ranieńnie partyzanaŭ pad Asipovičami ničoha nie viadoma, raskazali «Našaj Nivie» ŭ supolnaści «Rabočy ruch».
«Napeŭna, heta ŭkid», — adkazaŭ našamu karespandentu pradstaŭnik supolnaści.
Siońnia prapahandyst Juryj Cierach napisaŭ, što patrul vajskoŭcaŭ unutranych vojskaŭ ciažka paraniŭ z aŭtamatyčnaj zbroi dvuch čałaviek, jakija ažyćciaŭlali dyviersiju na čyhuncy.
Pa infarmacyi telehram-kanała @belzhd_live, 30 sakavika na pierahonie Savičy — Biarezina (učastak Asipovičy — Homiel), pablizu prypynačnaha punkta «Babina», byli ŭskrytyja relejnyja šafy, adnu ź ich paśpieli padpalić.
U toj ža čas u lesapałasie niepadalok znachodziłasia patrulnaja hrupa z unutranych vojskaŭ, jakaja adkryła pa partyzanach ahoń z bajavoj zbroi.
Ale telehram-kanał śćviardžaŭ, što im udałosia ŭciačy ad pieraśledu.
Ceły šerah aktaŭ sabatažu na čyhunkach Biełarusi byŭ ździejśnieny na zaklik supolnaści «Bajpoł», jakaja jadnaje aficeraŭ — praciŭnikaŭ dyktatury, paśla taho jak Rasija z terytoryi Biełarusi napała na Ukrainu. Na niekatorych pierahonach byli spalenyja relejnyja šafy, na inšych — zamknuli drotam rejki, tym samym vyvieli z ładu sihnalizacyju. Pad Stoŭbcami siamja vyciahnuła na rejki biarviony. Hetyja akcyi zapavolvajuć ruch ciahnikoŭ na niekatory čas, ale nie ŭpłyvajuć na biaśpieku ruchu.
Paśla hetaha stała viadoma pra aryšt u roznych rehijonach Biełarusi troch dziasiatkaŭ čyhunačnikaŭ, źviazanych z padpollem. Akramia taho, Kamitet dziaržaŭnaj biaśpieki Biełarusi i HUBAZiK, struktura Ministerstva ŭnutranych spraŭ, jakaja vykonvaje funkcyi palityčnaj palicyi, za apošnija tydni aryštavała niekalki dziasiatkaŭ ludziej u Mazyry i rajonie, u Śvietłahorsku i rajonie, u Baranavičach, Stoŭbcach i ŭ Dziaržynsku. Metami zatrymańniaŭ byŭ pošuk ludziej, jakija rychtavali akty drobnaha sabatažu na čyhuncy abo pieradavali ŭ niezaležnyja ŚMI i telehram-kanały infarmacyju ab pieramiaščeńni rasijskich vojskaŭ ci puskach rakiet pa Ukrainie.
Va Ukrainie viestki pra dyviersii na biełaruskich čyhunkach hramadskaja dumka pryniała ź vialikaj udziačnaściu.
«Pa supracoŭnikach pracuje niepasredna KDB». Padrabiaznaści zatrymańniaŭ na čyhuncy
-
Katalicki sajt: Na Pieršym kanale katalickaja imša zastałasia, źnikła jana z kanała «Kultura»
-
Azaronak pra zakryćcio biełaruskich kram: Prybrali tamu, što vy heta lubili. Mnie nie lanota siadzieć i hladzieć, dzie što pradajuć
-
Cichanoŭskaja: Kali my nie pazbavimsia hetaha režymu, pahroza z terytoryi Biełarusi budzie zastavacca pastajannaj
Kamientary