MVF zaniepakojeny biednaściu ZVR Biełarusi

Pra heta zajaviŭ 25 žniŭnia ŭ Minsku dyrektar Jeŭrapiejskaha departamienta MVF Marak Belka na sustrečy z premjer‑ministram Biełarusi Siarhiejem Sidorskim. Adnak u cełym MVF Biełaruśsiu zadavoleny.

Pradstaŭnik MVF zaznačyŭ, što ŭ karotkaterminovaj pierśpiektyvie zaniepakojenaść vyklikaje mienavita «prablema nizkaha ŭzroŭniu zamiežnych reziervaŭ» Biełarusi, «jakaja moža ŭjaŭlać pahrozu dla stabilnaści krainy». Pavodle jaho słoŭ,

na hetym pytańni ŭ asnoŭnym skancentravana ŭvaha ŭ miežach realizavanaj biełaruskimi ŭładami sumiesna z MVF prahramy, dziejańnie jakoj zakančvajecca ŭ pačatku nastupnaha hoda.

«Hetaja prablema źjaŭlajecca asnoŭnaj temaj, jakuju my abmiarkoŭvajem na sustrečach sa staršynioj praŭleńnia Nacyjanalnaha banka Piatrom Prakapovičam i ministram finansaŭ Andrejem Charkaŭcom. My abmiarkoŭvajem hetuju prablemu z punktu hledžańnia patokaŭ kredytu i ich uździejańnia na adtok reziervaŭ, z punktu hledžańnia biudžetnaj palityki, a taksama jaje ŭpłyvu na ŭnutrany popyt, jaki, u svaju čarhu, upłyvaje na reziervy», — zaznačyŭ Marak Belka.

«U cełym my zadavolenyja ahulnym kirunkam ekanamičnaj palityki, jakuju pravodzić urad Biełarusi», — zaznačyŭ dyrektar Jeŭrapiejskaha departamienta MVF.

Belka patłumačyŭ, što ŭ miežach ciapierašniaj misii MVF idzie praca pa dvuch kirunkach. Dadzienaja misija pravodzić druhi ahlad prahramy ŭ miežach kredytu stand‑by, i dyskusii skancentravany na pytańniach bolš karotkaterminovaha charaktaru. Aprača taho, jaje metaj źjaŭlajecca praviadzieńnie zvyčajnych kansultacyj pa artykule IV statuta MVF, jakija ŭjaŭlajuć saboj tradycyjny manitorynh raźvićcia kožnaj krainy — člena Mižnarodnaha valutnaha fondu. U dadzienym vypadku dyskusii skancentravany na pytańniach bolš doŭhaterminovaha charaktaru i źviazany z raźvićciom biełaruskaj ekanomiki ŭ pierśpiektyvie, i ŭ pryvatnaści razhladajecca pytańnie ab tym, jakim čynam zabiaśpiečyć vysokija temy ekanamičnaha rostu, što naziralisia ŭ krainie ŭ dakryzisny pieryjad.

Zołatavalutnyja reziervy Biełarusi na 1 žniŭnia skłali 3 młrd 161,9 młn dalaraŭ.

Rost zabiaśpiečyŭ druhi tranš kredytu MVF pa prahramie stend‑baj u abjomie kala 680 młn. dołaraŭ, jaki pastupiŭ 2 lipienia.

Usiaho ad pačatku hodu Biełaruś atrymała kredytaŭ na sumu amal 2,5 młrd dalaraŭ ZŠA. Hetyja srodki byli zaličany ŭ skład zołatavalutnych reziervaŭ krainy, adnak pieravažnaja ich častka była adrazu vytračana na biahučyja ekanamičnyja patreby.

Marak Belka byŭ apošnim premjer‑ministram Polščy pry Kvaśnieŭskim. A Kvaśnieŭski na siońnia ŭznačalvaje kułuarnuju «kantaktavuju hrupu pa Biełarusi».

Belka prybyŭ u Minsk 24 žniŭnia. Jon budzie znachodzicca ŭ Biełarusi da 26 žniŭnia.

Z 18 žniŭnia da 2 vieraśnia ŭ Biełarusi pracuje hrupa ekśpiertaŭ MVF na čale z kiraŭnikom misii fondu Krystafieram Džarvisam. Misija aceńvaje chod vykanańnia biełaruskim uradam prahramy, jakaja padtrymlivajecca kredytam stand‑by u ahulnym pamiery 3,52 młrd dalaraŭ ZŠA.

Biełaruś źviarnułasia pa atrymańnie kredytu da MVF u kastryčniku 2008 hoda «ŭ metach pavieličeńnia dziaržaŭnych zołatavalutnych reziervaŭ i stvareńnia «paduški biaśpieki», nieabchodnaj dla stabilnaj pracy ekanomiki va ŭmovach suśvietnaha finansavaha kryzisu».

U studzieni 2009 hoda kiraŭnictva MVF uchvaliła prahramu stand‑by dla Biełarusi na 2,46 młrd dalaraŭ pad prahramu ekanamičnych reform, raźličanuju na 15 miesiacaŭ (da krasavika 2010 hoda). Pieršy tranš kredytu ŭ 788 młn. dalaraŭ ZŠA pa staŭcy LIBOR plus 0,75% hadavych pastupiŭ u Biełaruś 14 studzienia, astatnija srodki pieraličvajucca z ulikam pakvartalnych spravazdač biełaruskaha ŭrada.

29 červienia Rada dyrektaraŭ MVF zaviaršyŭ pieršy ahlad u miežach damoŭlenaści z uładami Biełarusi ab kredycie stand‑by. Pry hetym fond zaćvierdziŭ vydaču čarhovaha tranšu kredytu ŭ pamiery 679,2 młn dalaraŭ ZŠA i pavialičyŭ u cełym abjom finansavaj padtrymki na 1 młrd dalaraŭ — da 3,52 młrd.

Druhi tranš kredytu MVF pastupiŭ u Biełaruś 2 lipienia.

Da kanca hoda Nacbank raźličvaje atrymać ad MVF jašče dva tranšy na sumu 1,35 młrd dalaraŭ stabilizacyjnaha kredytu. Umovaju dla atrymańnia nastupnych kredytaŭ ad MVF stanie pryvatyzacyja dziaržaŭnych aktyvaŭ.

* * *

Marak Belka (nar. u 1952) — viadomy ŭ mižnarodnych finansavych kołach ekanamist, prafiesar. U 1990—1996 hadach — kansultant Ministerstva finansaŭ Polščy; u 1997, a taksama 2001—2002 — ministr finansaŭ Polščy; u 2004—2005 — premjer‑ministr Polščy. U 2006—2008 — namieśnik hienieralnaha sakratara AAN — vykanaŭčy sakratar Jeŭrapiejskaj ekanamičnaj kamisii AAN. Z 2008 — dyrektar Jeŭrapiejskaha departamienta MVF.

BiełaPAN; MB

• 0
• 0
• 0
• 0
• 0
• 0
• 0
• 0