Maskva apublikavała «statystyku» zamiežnych najomnikaŭ, jakija vajujuć za Ukrainu. Adna ličba dakazvaje, što jana całkam iłžyvaja

«Tak, siarod jeŭrapiejskich krain biezumoŭnym lidaram u kolkaści najomnikaŭ, jak tych, što prybyli, tak i tych, chto zahinuŭ — źjaŭlajecca Polšča. Z pačatku śpiecyjalnaj vajennaj apieracyi va Ukrainu prybyŭ 1831 čałaviek, ź jakich užo źniščana 378 i 272 viarnulisia na radzimu. Za joj idzie Rumynija — 504 prybyli, 102 zahinuli, 98 źjechali. Na trecim miescy Vialikabrytanija: 422 prybyli, 101 zahinuły, 95 źjechali», — raspavioŭ jon.

Jość u hetym śpisie i Biełaruś. Śćviardžajecca, što z našaj krainy z pačatku vajny va Ukrainu prybyli 197 dobraachvotnikaŭ, ź ich nibyta 69 zabili, a 59 vyjechali z Ukrainy. 

Pavialičyć

Miž tym my viedajem kolkaść zabitych na vajnie biełarusaŭ z absalutnaj dakładnaściu.

Na siońnia viadoma pra śmierć šaści biełarusaŭ, jakija vajavali dobraachvotnikami na ŭkrainskim baku. Usie jany byli z vajskovymi ŭšanavańniami pachavanyja.

Heta:

• Illa «Lićvin» Chrenaŭ (vajavaŭ u «Azovie» z 2014 hoda)
• Alaksiej «Tur» Skobla (vajavaŭ z 2015 hoda)
• Źmicier «Teror» Apanasovič (pryjechaŭ u 2022 hodzie)
• Dźmitryj «Hans» Rubašeŭski (vajavaŭ z 2015 hoda)
• Kanstancin «Dranik» Dziubajła (vajavaŭ z 2014 hoda)
• Pavieł «Vołat» (byŭ na vajnie z 2016 hoda)

Takim čynam, dekłaravanaja rasijskaj prapahandaj ličba razychodzicca z realnaj u 12 razoŭ. 

Va ŭkrainskich umovach utaić realnuju kolkaść zabitych biełaruskich dobraachvotnikaŭ nierealna. Dziejnaść vajskovych farmavańniaŭ, u jakich słužać biełarusy, absalutna adkrytaja i prazrystaja. 

I jašče adno. My nie majem dakładnaj statystyki, ale pa acenkach «Našaj Nivy», siarod zamiežnych dobraachvotnikaŭ va Ukrainie biełarusaŭ — najbolš. Što dakładna — hramadzianie inšych krain, jakija zahinuli va Ukrainie, viadomyja taksama pajmienna, jak i biełarusy. Nasamreč, ich niašmat. Biełarusaŭ zahinuła adnosna mnoha (šeść), tamu što ich vajuje adnosna mnoha.

Treba adznačyć, što rasijskija vajskovyja prapahandysty manipulujuć paniaćciami, nazyvajučy ŭsich zamiežnych hramadzian u šerahach ukrainskaj armii «najomnikami». Heta nie adpaviadaje mižnarodna pryniatamu vyznačeńniu hetaha słova. Značnaja častka hramadzian inšych krain, jakija vajujuć za Ukrainu, majuć padpisanyja kantrakty z ukrainskaj armijaj, daŭno intehravanyja va ŭkrainskaje hramadstva, niekatoryja navat majuć ukrainskaje hramadzianstva, tamu nijak nie mohuć źjaŭlacca «najomnikami». 

Čamu rasijanie i łukašenkaŭcy ŭvieś čas kažuć pra «najomnikaŭ»? Prosta im treba paćvierdžańnie svajoj prapahandysckaj ustanoŭki, što Ukrainu abaraniajuć «najomniki». Tamu za «najomnikaŭ» vydajuć usich ukrainskich vajskoŭcaŭ, jakija ciapier ci ŭ minułym mieli zamiežnyja pašparty. 

• 73
• 0
• 13
• 11
• 2
• 4
• 5
• 0