Pravaabaroncy: Siabry niepryznanaha Sajuza palakaŭ nie pieršyja, na kaho zaviali spravu pa hetym artykule
Siońnia stała viadoma pra pieratrusy i novyja kryminalnyja spravy suprać kiraŭnikoŭ niepryznanaha ŭładami Sajuza palakaŭ Biełarusi. Pravabaroncy śćviardžajuć, što heta ŭžo nie pieršyja kryminalnyja spravy, zaviedzienyja za niezakonnuju arhanizacyju dziejnaści hramadskaha abjadnańnia i ŭdzieł u im.
Pieratrusy i kryminalnyja spravy
Na słužbovych asob niepryznanaha Sajuza palakaŭ Biełarusi zaviali kryminalnuju spravu. U kvaterach staršyni Hałoŭnaj rady Sajuza palakaŭ Biełarusi Ireny Valuś i namieśnicy staršyni Renaty Dziemiančuk adbylisia pieratrusy. Pra heta paviedamlaŭ na staroncy ŭ Facebook namieśnik staršyni Sajuza palakaŭ Marek Zanieŭski.
Zatrymanych abvinavačvajuć u niezakonnaj arhanizacyi dziejnaści hramadskaha abjadnańnia i ŭdzieł u im (art. 193-1 KK). Pa hetym artykule abvinavačanym pahražaje aryšt abo pazbaŭleńnie voli na termin da dvuch hadoŭ.
Pa słovach pravaabaroncy «Viasny» Paŭła Sapiełki, heta ŭžo nie pieršy vypadak, kali na členaŭ niezarehistravanych abo likvidavanych arhanizacyj zavodziać kryminalnyja spravy. Letam, naprykład, pavodle hetaha artykuła zaviali kryminałku suprać dyrektarki hrodzienskaha chośpisa Volhi Vialička.
«Nam viadoma, što niadaŭna taksama była zaviedzienaja kryminalnaja sprava za ŭdzieł u likvidavanaj arhanizacyi. Abvinavačanyja vyrašyli nie apubličvać hetuju infarmacyju, tamu jana i nie trapiła ŭ ŚMI. Prysud pa toj spravie jašče nie vyniesieny», — kaža Sapiełka.
Aproč hetaha, prakuratura Hrodzienskaj vobłaści nakiravała ŭ Ekanamičny sud zajavu ab likvidacyi TAA «Kleryhata» — firmy, praź jakuju, pa ich viersii, pracavaŭ niepryznany ŭładami Sajuz palakaŭ. Prakuratura śćviardžaje, što parušeńniem zakanadaŭstva źjaŭlajecca toje, što subjekt haspadarańnia, akramia praduhledžanaj statutam dziejnaści, realizoŭvaŭ mety i zadačy hramadskaha abjadnańnia, jakoje nie było zarehistravana ŭ Respublicy Biełaruś u vyznačanym zakonam paradku.
Kolkaść likvidavanych arhanizacyj raście
Palityčna matyvavanaja prymusovaja likvidacyja arhanizacyj źjaŭlajecca adnym ź vidaŭ represij u Biełarusi. Zhodna z padlikami lawtrend, pa stanie na 31 kastryčnika ŭ Biełarusi naličvajecca nie mienš za 1057 likvidavanych niekamiercyjnych arhanizacyj (hramadskich abjadnańniaŭ, prafiesijnych sajuzaŭ, fondaŭ, niedziaržaŭnych ustanoŭ i asacyjacyj). Jašče nie mienš za 667 niekamiercyjnyja arhanizacyi znachodziacca ŭ pracesie prymusovaj likvidacyi.
Kryminalnaja adkaznaść zamiest administracyjnaj
Cikava, što artykuł 193-1 Kryminalnaha kodeksa dziejničaŭ z 2005 hoda, ale ŭ 2019 hodzie adbyłasia libieralizacyja zakanadaŭstva, padčas jakoj jaho vyklučyli z Kryminalnaha kodeksa. Paśla hetaha za anałahičnaje pravaparušeńnie praduhledžvałasia tolki administracyjnaja adkaznaść, maksimalny pamier pakarańnia składaŭ štraf u 50 bazavych vieličyń. Adnak adliha pratrymałasia niadoŭha, kryminalnuju adkaznaść za hetyja dziejańni viarnuli ŭ śniežni 2021 hoda, kali ŭ Biełarusi pačali ŭzmacniać adkaznaść pa palityčnych artykułach.
Adnak da apošniaha času było nieviadoma, kab ułady zavodzili kryminalnyja spravy pa dadzienym artykule.
Jak adbyvajecca pieraśled palakaŭ u Biełarusi?
U sakaviku 2021 hoda zatrymali staršyniu Sajuza palakaŭ Anžaliku Borys i žurnalista dy aktyvista niepryznanaha Sajuza palakaŭ Andžeja Pačobuta. Pa «spravie palakaŭ» viasnoj minułaha hoda taksama adbyvalisia zatrymańni i pieratrusy ŭ Breście, Lidzie i Vaŭkavysku. U vieraśni 2022 hoda sud likvidavaŭ hramadskuju arhanizacyju «Polska Maciež Školna». Taksama ŭ stadyi likvidacyi znachodzicca hramadskaje abjadnańnie «Supolnaść palakaŭ».
Kamientary