Frederyk Farsajt: Na miescy Izrailu Brytanija pastupiła b analahičnym čynam

Prakamentavać libanski kryzys i jahonyja mahčymyja šlachi vyrašeńnia Radio Svoboda paprasiła viadomaha brytanskaha piśmieńnika Frederyka Farsajta – aŭtara ramanaŭ «Dzień šakała», «Čaćvierty pratakoł», «Ikona» i mnohich inšych.

– Što, na vaš pohlad, adbyvajecca ŭ Libanie?

– Toje, što tam adbyvajecca, – heta analah małoj vajny. Heta vajna, što viadziecca pamiž terarystyčnym rucham i dziaržavaj. U našym vypadku terarystyčnaja arhanizacyja, jak zvyčajna, chavajecca pamiž mirnaha nasielnictva, jana pierachoŭvaje zbroju i bajevikoŭ siarod žančyn i dziaciej, vykarystoŭvaje ich u jakaści ščyta. Mienavita tamu Izrail vymušany štoraz vysłuchoŭvać žachlivuju reakcyju suśvietnaj presy, što abrynułasia na jaho, choć jahonyja bomby traplajuć u cel. Mnohija zabyvajuć, što abstreł Izrailu rakietami pačaŭsia zadoŭha da taho, jak tudy prybyli pradstaŭniki ŚMI. Pačałosia heta zadoŭha da taho, jak «Chiezbałach» zachapiŭ dvuch izrailskich žaŭnieraŭ. Chacieŭ by ja viedać, kolki krain, što krytykujuć ciapier Izrail, ničoha b nie zrabili, kali b na ich harady sypalisia rakiety. Miarkuju, što niašmat. Miarkuju, što Francyja, Niamieččyna, Italija, Hišpanija dy inšyja krainy nie pahadzilisia b z hetym, kali b byli na miescy Tel-Avivu.

– Ci padzialajecie vy pazycyju brytanskaha ŭradu ŭ libanskim kryzysie?

– Chacieŭ by ja viedać, u čym heta pazycyja zaklučajecca. Naš premjer-ministar ćviorda padtrymlivaje Džordža Buša, tady jak lider pałaty hramadaŭ i były ministar zamiežnych spraŭ krytykujuć jaho. Tak što ja nie zusim razumieju, u čym zaklučajecca uradavaja palityka. Aproč taho, naš ministar zamiežnych spraŭ – bieskarysnaja Marharet Bekiet – nia moža jasna jaje sfarmulavać, i padobna, znachodzicca niedzie ŭ adpačynku.

– Jakim vam bačycca vyrašeńnie libanskaha kryzysu?

– Naŭrad ci jano mahčyma zaraz ci ŭ karotkaterminovaj perspektyvie. Heta supraćstajańnie doŭžycca ŭžo 20 hadoŭ. Niama nijakaj upeŭnienaści ŭ tym, što Zachad, judejska-chryścijanski śviet i navat pamierany isłam (jaki taksama źjaŭlajecca metaj terarystaŭ), spyniać isłamskich terarystaŭ. Ich patrabavańni nievykanalnyja, my prosta ich nia možam vykanać, nia možam adradzić chalifat. Nia možam i arhanizavać niešta nakštałt kryžovaha pachodu. Patrabavańni isłamistaŭ varjackija i nievykanalnyja, i ŭ Zachada prosta niama inšaha vyjścia, jak abaraniać siabie. A Izrail, za vyniatkam hieahrafičnaha stanovišča , častka Zachadu. I jon abaraniaje siabie, jak heta rabili b my, kali bomby padali na Londan.

– Vy ŭpeŭnienyja ŭ hetym?

– U nas nie było b inšaha vybaru. Svaju b rolu adyhrała hramadzkaja dumka... Ci možna hety adkaz Izraila ličyć praźmiernym, vyrašyć historyja. Ale ja ŭpeŭnieny ŭ dźviuch rečach, što tyčacca niadaŭniaha incydentu ŭ vioscy Kana. Pieršaja: izrailski pilot nia viedaŭ, što ŭ padvale doma znachodzilisia žančyny i dzieci. Jamu było zahadana źniščyć hety budynak, bo ŭ im raźmiaščalisia rakietnyja ŭstanoŭki. I druhaja: ludzi, jakija viedali, što ŭ padvale doma znachodziacca žančyny i dzieci, byli miascovymi čalcami«Chiezbałach». Čamu ŭ takim vypadku hetyja ludzi vykarystoŭvali hety budynak dla zapusku rakiet. Zrabiŭšy heta. Jany cudoŭna razumieli, što adkaz Izrailu budzie ŭžo praź niekalki chvilin. Što i adbyłosia.

Skaročana

Pavodle Radio Svoboda

• 0
• 0
• 0
• 0
• 0
• 0
• 0
• 0