Apublikavana jašče adno videa z «zabojstvam kuvałdaj» najmita PVK «Vahnier»
Blizki da PVK «Vahnier» telehram-kanał Grey Zone apublikavaŭ jašče adno videa, na jakim, jak miarkujecca, pakazana zabojstva kuvałdaj najmita pryvatnaj vajskovaj kampanii, jaki zdaŭsia ŭ pałon. Raniej hety ž kanał publikavaŭ rolik z pazasudovym pakarańniem śmierciu bajca PVK «Vahnier» Jaŭhiena Nužyna, raskazvaje Ruskaja słužba VVS.
Jak skazana ŭ telehram-kanale, blizkim da PVK «Vahnier», hety čałaviek «zachvareŭ na adnu i tuju ž chvarobu, ad jakoj hublaješ prytomnaść u haradach Ukrainy, to ŭ Kijevie, ciapier u Dniapry, a paśla pračynaješsia ŭ padvale na svaim apošnim sudovym pasiadžeńni».
Na novym videa pakazany čałaviek, hałava jakoha prymatanaja skotčam da kamienia. Jon nazyvaje siabie Dźmitryjem Jakuščankam i kaža, što naradziŭsia ŭ Krymie, trapiŭ u turmu, adpraviŭsia na front u składzie PVK «Vahnier», a na piarednim krai zrazumieŭ, što heta nie jaho vajna.
Danyja ab tym, što na videa čałaviek mienavita z takim imiem i proźviščam, paćviardžajucca tolki jaho słovami i paviedamleńniem telehram-kanała.
«Jakuščanka» śćviardžaje, što znachodziŭsia ŭ horadzie Dniapro, dzie atrymaŭ udar pa hałavie i straciŭ prytomnaść. «Ačuniaŭ u hetym pamiaškańni, dzie mnie skazali, što mianie buduć sudzić», — praciahvaje hety čałaviek.
Na roliku vidać, jak adrazu paśla hetaha čałaviek, jaki staić za «Jakuščankam», bje kuvałdaj pa miescy, dzie znachodzicca taho hałava. U hety momant bolšaja častka kadra razmytaja, tamu zrazumieć, što mienavita adbyvajecca, niemahčyma. Ale «Jakuščanka» adrazu ž padaje nazad, a čałaviek z kuvałdaj praciahvaje jaho dabivać.
U tym ža roliku apublikavanyja frahmienty apaviadańnia «Jakuščanki», jaki trapiŭ u pałon, jakoje jašče ŭ listapadzie minułaha hoda raźmiaścili niekatoryja ŭkrainskija ŚMI. Raniej videa było zroblena nieŭzabavie paśla taho, jak hety čałaviek trapiŭ u pałon.
«Jakuščanka» raspaviadaje, što jon byŭ asudžany na 19 hadoŭ i adbyvaŭ pakarańnie ŭ Sarataŭskaj vobłaści, u horadzie Enhielsie. Miarkujučy ź jahonych słoŭ, jon trapiŭ u turmu ŭ Krymie jašče ŭ momant, kali paŭvostraŭ znachodziŭsia pad kantrolem Ukrainy, a paźniej byŭ pieraviedzieny na terytoryju Rasii.
Jak kaža «Jakuščanka», jašče nakiroŭvajučysia na front, jon płanavaŭ «znajści jakuju-niebudź ščylinu, prosta, jak toj kazaŭ, źbiehčy». Dalej jon raspaviadaje, jak zdaŭsia ŭ pałon ukrainskim vajskoŭcam kala Bachmuta.
Videa z «Jakuščankam» zmanciravana sapraŭdy hetak ža, jak rolik ź jašče adnym «vahnieraŭcam» Jaŭhienam Nužynym.
Kamientary