Kitajskaja ekanomika paskoryła rost paśla kavidnaha prasiadańnia
Značnaje pavieličeńnie ekanamičnaj aktyŭnaści ŭ apošnija dva miesiacy daje kitajskim lidaram mahčymaść adciahnuć uvahu ad pamyłak, źviazanych z pandemijaj, adznačaje WSJ.
Ekanamičnaja aktyŭnaść u Kitai rezka vyrasła druhi miesiac zapar — i heta možna ličyć rańniaj prykmietaj taho, što kraina pieraadolvaje nastupstvy kavidnych abmiežavańniaŭ raniej, čym čakałasia.
Aficyjny pakazčyk vytvorčaści ŭ lutym ros samymi chutkimi tempami za bolš jak dziesiacihodździe, a ekspartnyja zamovy vyraśli ŭpieršyniu amal za dva hady, paviedamiła Nacyjanalnaje biuro statystyki Kitaja. Dziejnaść u śfiery pasłuh i budaŭnictva taksama pašyryłasia, jak pakazała spravazdača indeksa mieniedžaraŭ pa zakupkach.
Letaś ekanomika Kitaja vyrasła tolki na 3%, što stała adnym z samych pavolnych tempaŭ za apošnija dziesiacihodździ. Pryčyna hetaha — miery baraćby z pandemijaj, z-za jakich zakrylisia zavody, źnizilisia prodaž žylla i spažyvieckija vydatki.
Apošnija danyja — doŭhačakanaja palohka dla vyšejšych kiraŭnikoŭ krainy, jakija źbiarucca na štohadovy źjezd kiroŭnaj Kamunistyčnaj partyi ŭ hetyja vychadnyja. Dobraja statystyka dapamoža pryciahnuć uvahu da ekanamičnaha rostu i nie źviartacca da temy škody, naniesienaj palitykaj pa baraćbie z karanavirusam. Taksama novyja danyja mohuć pierakanać palitykaŭ pavysić prahnoz sioletniaha rostu ekanomiki — i heta budzie krokam da adnaŭleńnia davieru kiraŭnictvu krainy.
Jak adznačaje WSJ, raniej kitajskija aficyjnyja asoby i ekanamičnyja daradcy abmiarkoŭvali abaznačeńnie sioletniaj mety rostu ekanomiki na ŭzroŭni kala 6%. Čakajecca, što kančatkovuju metu nazavuć u spravazdačy ab pracy ŭrada, ahučanaj na Usiekitajskim schodzie narodnych pradstaŭnikoŭ u niadzielu.
Niekatoryja ekanamisty pieraścierahajuć ad praźmiernaha aptymizmu na padstavie lutaŭskich danych, bo źviestki adlustroŭvajuć razavyja faktary, takija jak śviatkavańnie Miesiacovaha Novaha hoda i adkładzieny popyt, vyklikany prypynieńniem palityki «nulavoha kavidu» ŭ śniežni. «Choć ekanomika Kitaja sapraŭdy adnaŭlajecca, jana jašče nie dasiahnuła punkta, u jakim budzie harantavany rost na 6%», — miarkuje Łary Chu, hałoŭny ekanamist Macquarie Group pa Kitai. Jon prahnazuje sioleta rost na 5,5%.
Ciapier čytajuć
Ź Ministerstva kultury zvolnili pieršaha namieśnika Markava1
Kamientary